Partia Republikane ka organizuar një takim të strukturave drejtuese në kuadër të zgjedhjeve parlamentare të 25 prillit. Gjatë fjalës së tij, kreu i PR, Fatmir Mediu u ndal tek situata e pandemisë në vend. Mediu theksoi se kjo qeverisje nuk ka shërbyer asnjë ditë për qytetarët.
Kreu i PR ka shtuar se vendi është në një situatë të vështirë dhe duhet një rizgjim i klasës politike, koordinim dhe qëndrime të përbashkëta.
“Dua të falenderoj, që të gjithë, mjekët dhe personelin shëndetësor për mbështetjen dhe kontributin që kanë dhënë në shërbim të jetës së njerëzve duke marrë përsipër dhe një risk jashtëzakonisht të madh, për jetën e tyre.
Nga ana tjetër, shpreh sinqerisht dhimbje dhe ngushëllimin për të gjithë jetët e humbura jo vetëm në Shqipëri po kudo që janë. Dhe për familjarët e tyre dhe për ata që kanë vuajtur dhe vuajnë.
Tërmeti duket sikur shkundi shumë gjëra në shoqërinë tonë, por sidomos kalbëzimin e një qeverisje problematike. Një qeverisje e cila në asnjë ditë të vetme të saj për qytetarët dhe interesat e tyre.
Shqipëria është në një moment kombëtar të vështirë e cila kërkon një rizgjim të klasës politike shqiptare kudo që ndodhet. Koordinim dhe qëndrime të përbashkëta përballë disa sfidave të cilat janë shumë të veçanta dhe kanë ngritur shumë pikëpyetje në të ardhmen e rajonit po në mënyrë të veçantë shqiptarëve të rajonit për të qenë shqiptarë të bashkuar në Europën e bashkuar. Janë kërcënime që vijnë me ndryshimet gjeopolitike me rritjen e peshës, prezencës dhe angazhimit të Rusisë dhe të Kinës.
Probleme që kanë të bëjnë me qeverisje, ku nuk kemi më qeverisje demokratike por qeverisje të njerëzve të fortë, të lidhur me korrupsioni dhe me krimin. Ku shteti mbivendoset mbi qytetarët. Problemet që vijnë nga krimi dhe korrupsioni dhe devijimin e qëllimeve dhe boshtit që kemi pasur si shqiptarë: Integrimi Euro-Atlantik. Dhe ajo që është më e rëndësishmja është vendosja e pushtetit mbi shtetin. Përballë gjithë këtë situatë kam bindjen që ndajmë të njëjtin qendrim që Rama nuk është pjesë e zgjidhjes. Rama është pjesë e problemit. Është vetë problemi”, tha ai.
Mediu theksoi më tej se opozita duhet patjetër të konceptojë ndryshe marrëdhënien e vet. Sipas tij opozita duhet të ketë një kontratë të qartë me qytetarët shqiptarë.
“Është momenti që opozita duhet patjetër të konceptojë ndryshe marrëdhënien e vet. Opozita nuk është opozitë që rend drejt pushtetit, por opozitë që ndërton shtetin. Dhe për ta bërë këtë opozita duhet të ketë një kontratë të qartë me qytetarët shqiptarë, për të treguar si do të ndërtojnë qeverisjen që buron nga vota e lirë e qytetareve.
Një qeverisje e cila vjen dhe bashkëpunon me qytetarët shqiptarë për interesat e qytetarëve shqiptarë. Pra një qeverisje gjithëpërfshirëse për të ardhur te elementi i dytë shumë i domosdoshëm që qeverisja nesër duhet të konsiderohet si qeverisja e njerëzve të aftë me integritet që i bashkohen opozitës dhe nuk është thjesht qeverisja dhe pushteti i lidershipit të opozitës”, tha Mediu.
VIDEO:
Diskutime rreth kësaj post