Komisioni Hetimor për shkarkimin e presidentit, Ilir Meta është mbledhur ditën e sotme ku është vendosur edhe data përfundimtare. Në fjalën e tij deputeti Halit Valteri tha se mazhoranca sa herë ka përplasje me kreun e shtetit, i bën presion përmes organizimit të mbledhjeve të tilla.
Sipas Valterit pas shumë muajsh që kur është ngritur, ende nuk ka asnjë produkt dhe rezultat nga puna e këtij komisioni.
Me deputetin ka replikuar kryetari i komisionit Ulsi Manja i cili ka treguar afatet kohore të punës teksa tha se opinion do të jetë gati deri në datën 18 Korrik ndërsa afati i punimeve të këtij Komisioni është deri më 30 Korrik.
Sipas Manjës, dosja do të dorëzohet në Kuvend deri më datën 18 Korrik dhe afati i Komisionit Hetimor përfundon së ekzistuari më 30 korrik dhe do jetë Parlamenti që do të vendos me votë.
Gjithashtu, gjatë mbledhjes, mësohet se do të diskutohet dhe raporti përfundimtar i Komisionit të Venecias, që i dha të drejtë Kreut të Shtetit.
Pak ditë më parë Komisioni i Venecias publikoi raportin përundimtar për emërimet në Gjykatën Kushtetuese. Sipas Venecias, Presidenti nuk ka shkelur Kushtetutën në procedurën e tij dhe me faj bëhet KED, pasi sipas Komisionit ka vepruar në fshehtësi dhe nuk ka qenë transparente. Po ashtu Venecia kërkoi dhe bashkëpunim mes palëve për vijimin e punës për emërimin e anëtarëve të Gjykatës Kushtetuese. Pas deklaratës së Komisionit, Meta dhe Ruçi zhvilluan një takim dhe u zotuan se do të vijonin punën së bashku.
Ndërkohë nga ana e maxhorancës ka pasur ‘zbutje’ në lidhje me kërkesën për të shkarkuar Presidentin Ilir Meta. Vetë Ulsi Manja u shpreh se ka pare reflektim tek Meta, ndërsa shtoi se këtë të hënën, do të shqyrtohen të gjithë provat kundër tij.
Diskutime rreth kësaj post