Xhaferraj: Porti i Durrësit po përdoret si lavatriçe e parave të ndotura të rilindjes, nuk do të kemi port të ri, por ndërtim vilash

Kreu i degës së Partisë Demokratike në qytetin e Durrësit, Ferdinand Xhaferraj, në një deklaratë për mediat projektin për Portin e Durrësit e ka cilësuar si një aferë për pastrimin e parave. Xhaferraj tha se mungesa e studimit për ndërtimin e portit bën që kjo gjë të nënkuptojë se ky vend po përdoret për pastrimin e parave të pista.

“Duket qartë se porti i Durrësit po përdoret si lavatriçe e parave të ndotura të rilindjes. Kur gjërat bëhen pa projekte, pa transparencë, pa ligj në mënyrë të padiskutueshme shkohet te lavatriçja. Nuk do të kemi port të ri këtu, por vila nga Ura e Dajlanit deri këtu dhe përpara do të parkohen jahte, është thjesht një marrëdhënie biznesi, nuk do të ketë port, vila për biznes dhe në det do të parkohen jahtet, kjo është e gjithë historia”, tha ai.

Xhaferraj shtoi më tej se qeverisë i është kërkuar informacion lidhur me këtë projekt. Ai tha se disa institucione europiane dhe ndërkombëtare që kanë financuar me kredi ndërtimin e infrastrukturës portuale. Sipas Xhaferrajt, prishja e këtyre kontratave do ta çojë Shqipërinë sërish në arbitrazh për të paguar, si pasojë e papërgjegjshmërisë së kryeministrit.

“Dy ditë më parë kryeministri Rama hodhi për konsum maketin e portit të ri të Durrësit. Përsëri dhe si gjithmonë pamë një prezantim në 3D. Por nisur nga rëndësi që ka porti i Durrësit për qytetin dhe gjithë Shqipërinë, ne i kemi kërkuar dhe vazhdojmë t’i kërkojmë qeverisë sqarime për disa çështje: Së pari, qytetarët akoma nuk e dinë se mbi çfarë studimi do zhvendoset porti ekzistues. Ku do të zhvendoset, kur do të zhvendoset, si do të zhvendoset dhe çfarë kapacitetesh do të ketë? Së dyti: Janë disa institucione europiane dhe ndërkombëtare që kanë financuar me kredi ndërtimin e infrastrukturës portale”, tha Xhaferraj.