Viti 2020 pritet të rindezë tensionet politike. Teksa deri më 30 qershor vendi ziente nga protestat e opozitës dhe akuzat mes Ramës e Bashës, nga korriku e këtej kemi një luftë të fortë mes presidentit dhe qeverisë. Por edhe pse u duk sikur tërmeti i sheshoi mosmarrëveshjet, sinjalet janë se viti 2020 do të jetë akoma dhe më i nxehtë në aspektin politik.
Meta ka bllokuar një sërë ligjesh dhe po ashtu ka futur në kaos Kushtetuesen. Nga ana tjetër, mazhoranca ka vendosur që ta shkarkojë. Por shkarkimi pritet që të shënojë dhe kulmin e përplasjeve. Gazeta ka mësuar se Meta në korridoret e politikës dhe në bisedat me përfaqësues të opozitës ka theksuar se ditën që mazhoranca do të votojë për shkarkimin tij, ai do të nxjerrë një dekret për të shpërndarë Parlamentin.
Meta në çdo dalje publike thekson se nuk e njeh Kuvendin e Shqipërisë, pasi për të ky institucion ka vetëm 82 mandate deputetësh. Mirëpo, në kushtet kur ai nuk ka çfarë të humbë, mësohet se presidenti Meta do të tentojë të shpërndajë Parlamentin. Por kjo do e tensionojë situatën, pasi mazhoranca nuk do e njohë si dekret, duke qenë se në asnjë nen të Kushtetutës nuk i lind kjo e drejtë presidentit. Pra sinjalet janë të qarta se do të kemi një vit mjaft të egër.
Protestat
Përveç konfliktit me Ramën, Meta ka shumë divergjenca dhe me kryedemokratin Basha.
Ky i fundit të enjten që lamë pas mblodhi Kolegjin e Kryetarëve, ku ndau porosi për vartësit e vetë, ndërsa në asnjë rresht të fjalës së tij nuk ka përmendur rikthimin e protestave. Por heqja dorë nga protestat, duket se i ka hedhur edhe më shumë benzinë zjarrit, pasi mësohet se presidenti Meta dhe ish-kryeministri Sali Berisha kanë rritur ndjeshëm presionet ndaj kryedemokratit Basha. Burime nga selia blu, i pohuan gazetës se lideri demokrat ka informuar vartësit e vetë se Meta dhe Berisha i kanë kërkuar llogari për këtë ndryshim të kursit, ndërsa gjithashtu ia kanë bërë të qartë atij se protestat dhe revoltat janë e vetmja rrugë për të rrëzuar qeverinë autoritare të kryeministrit Edi Rama. Megjithatë, pavarësisht këtyre presioneve, Basha vijon i qetë drejtimin e PD, pasi ai jo vetëm që ka hequr dorë nga protestat, por sikundër e pohoi edhe në mbledhjen me Kolegjin e Kryetarëve për të rruga e vetme për të ardhur në pushtet janë zgjedhjet.
Meta dhe Berisha skenarë për trazira në pranverë
Por në kushtet kur kryedemokrati Lulzim Basha ka hequr dorë nga protestat dhe ka lënë në baltë presidentin Ilir Meta dhe ish-kryeministrin Sali Berisha në luftën me qeverinë, ndërkombëtarët dhe reforma në drejtësi, mësohet se këta të fundit kanë një plan B. Burime të sigurta nga selia blu i pohuan gazetës se kreu i shtetit, i mbështetur nga njerëz të Berishës dhe Lëvizja Socialiste për Integrim pritet të shkaktojnë trazira në pranverën që vjen, me qëllimi rrëzimin e qeverisë. Mësohet se këta ithtarë të Metës, do të shfrytëzojnë tubimet e paralajmëruara nga kreu i shtetit me qytetarët për mbrojtjen e Kushtetutës dhe rikthimin e referendumeve në Shqipëri, për të provokuar skenarë të dhunshëm. Po ashtu, mësohet se një tjetër arsye që Meta dhe Berisha janë revoltuar me Bashën, është fakti se lideri demokrat nuk po bën një opozitë të fortë ndaj mazhorancës qeverisëse dhe frika nga reforma në drejtësi dhe shkrirja e LSI. Madje, ajo që e vërteton më së miri se Meta dhe Berisha duan skenarë destabilizues janë edhe thirrjet e artikuluara nga këta të dy kohët e fundit, ku në çdo dalje publike kërkojnë revolta. Pra, presidenti Meta i ndihmuar nga Berisha dhe LSI pritet të nxjerrë njerëzit në rrugë kundër qeverisë, me qëllimi rrëzimin e saj.
Diskutime rreth kësaj post