Veliaj ironi me Kryemadhin për rindërtimin e shtëpive të prekura nga tërmeti: Ka dhoma dhe banjo për macet

Kryetari i Bashkisë së Tiranës, Erion Veliaj ka ironizuar Kryetaren e LSI, Monika Kryemadhi, në lidhje me akuzat e saj mbi procesin e rindërtimit. Nga Kombinati, ku zhvilloi një takim me strukturat e Partisë Socialiste, Veliaj tha se shqetësimi i vetëm i kryetares së LSI është interesi i saj politik.

“Kombinati ka pritur gjatë për çështjen e tërmetit dhe unë dua t’ju shoh në sy e t’ju them të vërtetën: Kemi bërë 22 gjyqe. Këtu vinte Monika Kryemadhi, që ka shtëpi e dhoma edhe për macet, ka edhe banjo për macet, por nuk ka një dhomë për një familje të prekur nga tërmeti, dhe i cyste njerëzit, u thoshte çojeni në gjyq, merrni masa bllokimi.

Po pse më bllokon të mos bëj shtëpitë e njerëzve? Çfarë duhet të bënim? Duhet të fitonim 22 gjyqet dhe i fituam 22 me 0, se progresi nuk ndalet”, u shpreh ai.

Veliaj shprehu bindjen se Bashkia e Tiranës do të fitojë edhe gjyqin për të zhbllokuar punën për heqjen e ndërtimeve pa leje te varrezat e Sharrës.