Deputeti i PS, Ulsi Manja ka folur rreth mesazheve të ambasadores amerikane, Yuri Kim drejtuar liderëve të partive politike shqiptare për t’u paraqitur me kandidatë të pastër në zgjedhje.
Manja thotë se është më se normale që ambasadorja e SHBA të ngrejë alarmin për zbatimin e ligjit të kriminalizimit, teksa ai garanton se PS jo vetëm do e zbatojë këtë, por do bëjë dhe filtrin moral.
Sipas tij, jo vetëm PS por të gjitha partitë janë të interesuara që në këto zgjedhje të paraqiten me kandidatë potencialë, por partia e tij kërkon një mandat të tretë dhe e ka të nevojshme sepse është tashmë një raport i ri me zgjedhësit.
Nga ana tjetër për Manjen roli i një kryetari partie tek listat e kandidatëve mbaron kur e dorëzon tek Prokurori i Përgjithshëm. Më pas është ky i fundit dhe KQZ që vendosin. Por ai paralajmëron se PS nuk është bërë, dhe as do bëhet mburojë për asnjë kandidat apo kryebashkiak që ka shkelur ligjin e dekriminalizimit.
”Besoj është normale, jemi 80 ditë para zgjedhjeve të 25 prillit. Fokusi i zbatimit të ligjit të dekriminalizimit duhet në çdo tryezë të partive. S’di çfarë ka më të rëndësishme në këtë fushatë se sa oferta për zgjedhësit, me lista e kandidatë potencialë, e të pastër.
Z.Rama, e çdo kandidat ka detyrimin të plotësojë kushtet e ligjit 138 të vitit 2015. E kemi votuar me konsensus të plotë. Kemi rënë dakord që këtë ligj mos e çojë asnjë parti në Gjykatën Kushtetuese. Jo vetëm partive kryesore. Çfarë mund të bëjnë partitë? Çdo kryetar duhet të bëjë filtrin, thelbi është vetëdeklarimi i kandidatëve. Natyrisht edhe partia politike, një nga subjektet që mund të kërkojë filtrin është edhe kryetari i partisë politike përkatëse. Por hapi i kryetarit të partisë është deri tek paraqitja. Këtu e mbaron misioni i ligjit të dekriminalizimit.
Çfarë mund të bëjë më tepër një kreytar partie, se sa të paraqesë listën, teksa çdo kandidat plotëson formularin. Kush do të garojë në 25 prill, këtë listë më kandidatë sigurisht me vullnetin e kandidatëve ta dorëzojë tek Prokurori i Përgjithshëm. Këtu mbaron filtri. Më pas nisin institucionet. Prokurori i Përgjithshëm, KQZ. Jo më kot ligji e ka lidhur me formularin, pasi kur vërehet në shkelje ndërpritet mandati.
PS për hir të së vërtetës që kur ka hyrë në fuqi ligji, nuk është bërë mburojë për asnjë nga kandidatët apo kryebashkiakët që kanë rezultuar pas filtrit në shkelje. Besoj çdo parti, do e bëjë filtrin jo vetëm nga pikëpamja e ligjit por edhe moral. Kërkojmë mandat të tretë. Duam një listë me kandidatë potencialë, me figura publike sepse është raport i ri me zgjedhësit. Kur them PS do e bëjë, jam i bindur se të gjitha do e bëjnë, dhe duhet të shkojnë me ofertë ndryshe përballë zgjedhësve.
E shoh si thirrje, apo kambanë për partitë për të zbatuar ligjin e dekriminalizimit. Ju thoni të bëjnë edhe filtër moral. S’kam arsye të paragjykoj sot listën e PS. Në momentin që do depozitohet lista për kandidatët, na fto dhe të themi se sa e ka bërë filtrin PS në raport me partitë e tjera. Nuk shoh asgjë të keqe që ambasadorja e SHBA, miqtë e partnerët ngrenë kambanën e alarmit. Partitë këtë radhë duhet të jenë vetë të interesuar, sepse do shkojnë para zgjedhësve dhe duhet të kërkojnë votën dhe për parti, dhe për kandidatë. Shqiptarët asnjëherë s’kanë gabuar në zgjedhje, asnjëherë.”, tha Manja.
Diskutime rreth kësaj post