Studiuesi i njohur Ardian Ndreca, komenton protestat e studentëve të cilët prej 4 ditësh rezistojnë para ministrisë së Arsimit duke kërkuar ndër të tjera Arsim Publik FALAS.
Ndreca thotë se po të ishte i ri nuk do protestonte vetëm për ulje tarifash, por për të mbyllur gjysmën e universiteteve shtetërore dhe private.
“Edhe po të ishin gratis, janë krejt të kota, s’përçojnë as dije bashkëkohore dhe s’krijojnë të ardhme”, shkruan studiuesi.
E PLOTË NGA ARDIAN NDRECA:
Ndiej tue thanë se lëvizja e studentave s’qenka politike! E përfytyrojnë politikën vetëm si diçka që mbarset dhe pjell në SHQUP dhe në Selinë rozë apo në strofullat tjera ku bahen pazarlleqet ma të ndyta që e kanë çue vendin në këtë shkallë.
Të rinjtë në rrugë janë qenje të mirëfillta politike, por s’janë të homologuem, kjo asht e vetmja risi e kësaj proteste.
Shpresoj që të rinjtë të mos ndigjojnë “këshillat” që u vijnë prej djathtas e majtas. Ata që sot japin këshilla të kishin dalë vetë në rrugë, pse arsye me dalë ka pasë kaherë, por tue qenë të homologuem me rroga, poste, privilegje, prostituim metodik, borde, interesa të vogla kanë preferue sistemin dhe jo protestën.
Do t’i duhej ndalue me ligj protesta atyne që janë ma shumë se 25 vjeça, pse në nji mënyrë a në nji tjetër janë fajtorë dhe bashkëfajtorë për gjendjen e krijueme.
Po të isha i ri s’do të protestoja vetëm për ulje tarifash por edhe për me mbyllë gjysmën e universiteteve shtetnore dhe pothuej të gjitha ato privatet.
Edhe po të ishin gratis, janë krejt të kota, s’përçojnë as dije bashkëkohore dhe s’krijojnë të ardhme.
Diskutime rreth kësaj post