Avokati Spartak Ngjela ka deklaruar ditën e djeshme se Rusia dhe Serbia, të cilat njihen për marrëdhëniet e tyre të ngushta, janë duke tentuar që të destabilizojnë Ballkanin përmes të korruptuarve. Përmes një postimi në rrjetin social Facebook, Ngjela ka komentuar aleancën e Shqipërisë me Shtetet e Bashkuara dhe është ndalur edhe tek Moska dhe Beogradi.
“Aleanca e Shqipërisë me Shtetet e Bashkuara të Amerikës dhe skema amerikane për Shqipërinë, ka shqetësuar armiqtë shekullorë të Shqipërisë: pushtues të territoreve shqiptare. Por, gjithashtu, ka trembur edhe korrupsionin e lartë shtetëror në Tiranë”, ka shkruar Ngjela.
Më tej ai është ndalur tek një pikë tepër e diskutuar, ku ngre dhe pyetjen a do të jetë politika amerikane ajo që do të risistemojë demokracinë antikorrupsion në Shqipëri. Më tej Ngjela shprehet se interesi amerikan dhe ai perëndimor po e kërkon diçka të tillë, dhe nga kjo shton ai trembet pikërisht Moska dhe Beogradi.
“Interesi amerikan dhe ai perëndimor po e kërkon, dhe pavarësia e Kosovës flet pozitivisht në përgjigje të kësaj pyetjeje. Pikërisht këtu është ngritur frika e Beogradit dhe Athinës, por edhe e korrupsionit të lartë shtetëror në Tiranë. Si rregull, Beogradi dhe Moska, në shekuj kanë punuar kundër Shqipërisë me korrupsionin e brendshëm shqiptar. Por, kjo luftë aktuale antikorrupsion në Shqipëri, po të shkojë deri në fund, do të ndryshojë në sens pozitiv vetë historinë e Shqipërisë. Si do të ndryshojë historia e Shqipërisë në sensin historik”, ka deklaruar Ngjela.
Marrëdhënia shqiptaro-amerikane
Sipas avokatit Ngjela, nëse do të marrim parasysh historikun e marrëdhënieve shqiptaro-amerikane, SHBA është duke i kujtuar Beogradit dhe Athinës si dhe të korruptuarve shqiptarë, se Amerika e ka mbrojtur Shqipërinë që në 1919.
“Në këto çaste të kohës sonë politike, politika amerikane, duke evokuar presidentin Willson, po i kujton Beogradit dhe Athinës historinë dhe, njëherësh, edhe lidershipit të korruptuar shqiptar, të të dy krahëve, mbrojtjen e madhe historike amerikane të Shqipërisë në vitin 1919-1920. Por, edhe Beogradi, edhe Athina, edhe Moska duhet të kujtohen se Presidenti Willson, jo vetëm mbrojti Shqipërinë territoriale në Konferencën e Parisit, por kërkoi rikthimin e territoreve të pushtuara shqiptare. E pra, pse po na e kujton politika e lartë amerikane, tani, pas njëqind vjetësh, këtë ndodhi historike? Sepse jemi sërish në të njëjtën kohë. Duhet të kujtohemi: historia rikthehet në formë cikli”, ka deklaruar avokati.
Më tej avokati ka sjellë në vëmendje edhe disa momente historike kur raportet amerikano-shqiptare kanë mbështetur edhe Kosovën. Ai ka shkruar mes të tjerash se të gjitha këto evente, tregojnë që mbijetesa e shqiptarëve në Ballkanin Perëndimor është edhe një vepër amerikane.
“Por, në raportet shqiptaro-amerikane ka edhe disa evente të tjera historike në mbështetje të shqiptarëve në lidhje me Kosovën. Ishte kërkesa e prerë e presidentit amerikan Nikson për autonominë e gjerë të Kosovës në vitin 1974; dhe më pas, lufta e vitit 1999 për çlirimin e Kosovës me aktin e madh të presidentit Klinton. Por, ka qenë edhe ndërhyrja e prerë e presidentit Kenedi, në Vjenë, në vitin 1961, kur i tha kryeministrit rus Nikita Hrushov: Shqipëria nuk preket. Të gjitha këto evente historike në mbrojtje të shqiptarëve, tregojnë që mbijetesa e shqiptarëve në Ballkanin Perëndimor është edhe një vepër amerikane, fakt ky që aktualisht po kuptohet se Shtetet e Bashkuara e kanë pozicionuar drejt politikën perëndimore kundrejt historisë së Shqipërisë. Me përjashtim të Francës”, ka shkruar ai.
Diskutime rreth kësaj post