Shkarkimi i Saimir Tahirit nga posti i Ministrit të Brendshëm, lajm i cili ende nuk konfirmohet zyrtarisht ka sjellë reagime të shumta. Por motivet e kësaj lëvizjeje kanë ngritur një sërë pikëpyetjesh. A ishte lëvizje për të kënaqur Ilir Metën i cili prej kohësh ka kërkuar largimin e Tahirit, apo ishte për t’i dhënë fund alibive të opozitës për pretendimet e saj?
Analistët kanë ngritur disa teza në lidhje me këtë lëvizje. Fatos Lubonja deklaroi se kjo lëvizje tregon se Rama e ka ende situatën nën kontroll.
“Nuk janë shkarkime për punë të keqe, por janë për të hequr një alibi. Opozita kërkonte shkarkimin e këtyre ministrave se këta janë rrezik, sepse Tahiri akuzohet se ka pasur kontrollin e grupeve kriminale. Vendimi i sotëm është rezultat i presionit që bëhet nga opozita. Kjo që bëri Rama nuk do të ndodhte nëse opozita s’do protestonte, por nga ana tjetër mund të jetë dhe truk siç tha Basha. Por nëse hiqet Tahiri, pasi siç thuhet se ka lidhjet me krimin, është një gjë, por gjë tjetër është nëse hiqet për t’i dhënë garanci opozitës se do kemi një ministër që do pastrojë lidhjet e policisë me krimin. Unë mendoj se Basha ka të drejtë kur thotë se ky shkarkim ngjan me një truk”, deklaroi Lubonja.
Ndërkohë Blendi Fevziu e shikon largimin e Tahiri më tepër si një lëvizje për të kënaqur Ilir Metën, që prej kohësh ka kërkuar shkarkimin e Tahirit. Fevziu thekson se vendimi i largimit te Tahirit “nuk ka lidhje me bilancin si Ministër”.
“Po përse Rama ka vendosur të sakrifikojë Tahirin? Tahiri ka qenë objekt shkëmbimi për koalicionin e ardhshëm. Ai ka qene ne qendër të sulmeve të Ilir Metës dhe me gjase, Meta është një nga shkaqet e largimit të tij. I trembur nga protesta dhe nga afria e Metës me të. Nën presionin qe asnjanësia e Metës mund ta stimulonte protestën, me gjase Rama ka vendosur të sakrifikojë Tahirin qe Meta të deklarohet që tani për koalicionin. Me këtë veprim Rama mendon se do dekurajojë PD dhe protestën e saj. Gjëja e tretë qe të vjen nder mend është presioni i mundshëm ndërkombëtar për te gjetur gjuhën me protestën e PD. Burime të sigurta kanë thënë për opinion.al se sinjale shumë të shqetësuara nga Brukseli janë nisur dje në adresë të Metës lidhur me qeverinë. Në këtë rast, për te shpëtuar veten Rama po tenton disa ndryshime ministrash për t’i dhënë asaj një karakter më pak politik”, shkruan Fevziu në Opinion.al.
Ndërkohë për Andi Bushatin largimi i Saimir tahirit nuk lidhet fare me çadrën e protestës. Ai sheh dy arsye të mundshme për largimin e Tahirit, por që nuk kanë lidhje me preisonin e oipozitës.
“Varianti i parë që qarkulloi për këtë akt të papritur ishte presioni i madh i Ilir Metës. Varianti i dytë është ai që pretendon se pavarësisht presionit të aleatit qeveritar, fati i Saimir Tahirit u vulos nga ndërkombëtarët”.
Por, per Bushatin, “kushdo që nga këto hipoteza të jetë e vërtetë, opozita nuk ka arsye pse të gëzohet. Sepse edhe nëse veproi i nënshtruar dhe i leckosur nga presioni i Metës, edhe në të kundërt, nëse u detyrua të reagojë nga insistimi i ndërkombëtarëve, Edi Rama nuk po e paraqet “shitjen” e ministrit të tij, si një shenjë reflektimi”, shkruan Bushati.
Diskutime rreth kësaj post