Nxehtësia anormale dhe kushtet gjeologjike, janë dy arsyet kryesore sipas Ministrit të Brendshëm italian, Matteo Piantedosi, të cilat çuan në shtyrjen e afatit të zbatimit të marrëveshjes Shqipëri-Itali për emigrantët, duke iu referuar këtu hapjes së qendrave të pritjes në Shëngjin dhe Gjadër.
“Zbatimi i projektit u vonua me disa javë për shkak të problemeve teknike të lidhura me kushtet gjeologjike të terrenit që kërkonin aktivitete verifikimi dhe konsolidimi dhe nga vala e zgjatur e nxehtësisë anormale që çoi në një ngadalësim të nevojshëm të punimeve për mbrojtjen e shëndetin e vetë punëtorëve të punësuar në vend”, tha ai.
Në fjalën e tij në Parlamentin italian, Piantedosi përditësoi të dhënat mbi koston e projektit, e cila do të kapë sipas tij vlerën e 800 milionë eurove për një periudhë 5-vjeçare.
“Kostoja e përgjithshme e projektit i referohet një periudhe pesëvjeçare, pra flasim për rreth 160 milionë në vit”, tha ministri.
Ai deklaroi se marrëveshja mes Italisë dhe Shqipërisë është një investikm i mirë që do ndihmojë qeverinë italiane të ulë kostot e menaxhimit të pritjes e cila përllogaritet me 1.6 miliardë euro në vit.
“Është një investim që do të na lejojë të ulim kostot e menaxhimit të pritjes. është sot e barabartë me afërsisht 1.7 miliardë euro në vit, të cilat qeveria në detyrë i trashëgoi nga epokat e mëparshme të karakterizuara nga ardhjet masive dhe të pakontrolluara të emigrantëve”, theksoi Piantedosi.
Kujtojmë se dy ditë më parë (6 gusht) La Repubblica raportoi se qendra e pritjes së emigrantëve në Gjadër është parashikuar të hapet në fund të muajit gusht dhe në fillim të muajit shtator.
Referuar të njëjtit artikull, u bë me dije se kontingjenti italian që do të menaxhojnë qendrat e emigrantëve, do të mbërrijë në Shqipëri më 20 gusht.
Qendra e pritjes së emigrantëve në Gjadër ishte parashikuar të hapej më datë 1 gusht, por u shty në një afat të papërcaktuar ende.
Në 6 nëntor, në vizitën e kryeministrit shqiptar në Itali u firmos marrëveshja për emigrantët.
Kujtojmë se marrëveshja mes Ramës dhe Melonit parashikon që emigrantët, të cilët mbërrijnë në Itali, të kthehen në Shqipëri dhe të qëndrojnë aty derisa vendi fqinj të përcaktojë nëse ata do të kthehen në vendin e origjinës apo do t’u pranohet kërkesa për azil.
Marrëveshja me Italinë u bllokua fillimisht nga deputetët e opozitës të cilët e çuan në Gjykatë Kushtetuese me pretendimin se kjo marrëveshje shkelte territorin juridik shqiptar.
Në 29 janar, me shumicë votash, Gjykata Kushtetuese i hapi dritën jeshile ratifikimit në Kuvend të marrëveshjes për emigrantët.
Në 15 shkurt të këtij viti, Marrëveshja për Emigrantët u miratua nga parlamenti italian me shumicë votash dhe 7 ditë më vonë, marrëveshja u ratifikua edhe në parlamentin shqiptar me 77 vota pro.
Diskutime rreth kësaj post