Testimet dhe niveli i tyre i ulët kanë qenë ndër shqetësimet më madhore që nga fillimi i pandemisë. Në gjykimin e ekspertëve, duke mos pasur një panoramë të saktë të situatës reale, është e vështirë të hartosh strategji apo të marrësh vendime mbi menaxhimin e mëtejshëm të situatës.
Të njëjtin shqetësim ka ndarë edhe mjeku endokrinolog, profesor Florian Toti.Përmes një postimi në rrjetet sociale, profesori ka dhënë informacion mbi nivelin e testeve të kryera në Itali dhe Zvicër, duke ngritur pikëpyetjen se përse në vendin tonë vijohet me politikën e testimit me pikatore. Referuar të dhënave zyrtare, në 37 javët e pandemisë janë kryer në total vetëm 71280 teste.
“Në një ditë, Italia bën më shumë testime për Covid-19 sesa kemi bërë ne nga fillimi i epidemisë. Zvicra i ka kaluar 1 milion testimet. Numri i madh i testimeve ka bërë që pozitiviteti i rasteve të jetë i ulët, 3 % Zvicra dhe 1.5 % Italia. Por kjo ka bërë që situata të jetë më e kontrolluar dhe hapat e mëtejshëm japin shpresa për optimizëm. Aq sa po diskutohen të pranohen edhe tifozë në numër të kontrolluar në stadium… Po te ne?”, – ka shkruar profesori.
Për javë me radhë, Shqipëria ka qenë në fund të listës së vendeve të Bashkimit Europian për numrin e ulët të tamponëve. Por, pavarësisht kësaj, asgjë nuk ka ndryshuar.
Liberalizimi i testeve apo mundësia për kryerjen e tyre në privat nuk mund të përballohet nga të gjithë, duke marrë në konsideratë këtu koston e lartë. Ndaj edhe për këtë ekspertët i kanë bërë thirrje qeverisë që të bëjë rimbursimin e plotë të tyre.
Diskutime rreth kësaj post