Shpikje shqiptare, 32 vjeçari mbush gomën rezervë me 7 kilogram drogë dhe provon “fatin” në kufi!

Një shqiptar i moshës 32 vjeçare e ka “provuar fatin” këtë të dielë në kufirin e Kakavijës, për të kaluar në Greqi një sasi prej 7 kilogramësh droge, e dyshuar si kanabis sativa.
Skerdi Hasani, banues në Memaliaj, po udhëtonte drejt shtetit fqinj me një automjet “Toyota Rav”, në momentin kur është ndalur nga policia për kontroll. Në pjesën e gomës rezervë, e cila ndodhet prapa fuoristradës, i riu kishte fshehur disa pako. Policia e ka zbuluar marifetin dhe me të carë gomën ka zbuluar plot 7 kilogram drogë brenda.

NJOFTIMI I POLICISË

Sekuestrohen rreth 7 kilogramë lëndë narkotike Cannabis Sativa.
Në pranga drejtuesi i mjetit që transportonte lëndën narkotike.
Në vijim të masave të marra nga ana e Poilcisë Kufitare për rritjen e forcës parandaluese, evidentuese dhe goditëse ndaj veprimtarisë kriminale në fushën e trafikimit të lëndëve narkotike, qënieve njerëzore, si dhe mallrave kontrabandë, veprimtari kjo që mund të zhvillohet duke përfituar edhe nga fluksi në rritje i turistëve dhe shtetasëve shqiptarë që jetojnë jashtë shtetit dhe vijnë për pushime në Shqipëri, shërbimet e Policisë Kufitare në bashkëpunim me shërbimet doganore kanë evidentuar dhe goditur një tentativë për trafik të lëndëve narkotike.

Shërbimet e Policisë Kufitare, kanë përzgjedhur për kontroll më të detajuar në vijë të dytë automjetin “Toyota Rav”, që drejtohej nga shtetasi S.H, 32 vjeç, banues ne Memaliaj, i cili udhëtonte për në Greqi.
Nga kontrolli i detajuar i kryer nga punonjësit e Policisë Kufitare në vijën e dytë ka rezultuar se në gomën rezervë kishte të fshehura disa pako të mbështjella me letër natriban të cilat dyshohet se janë të mbushura me lëndë narkotike Cannabis Sativa.
Menjëherë është njoftuar grupi Hetimor, ku kanë mbërritur Specialistët për Hetimin e Narkotikëve në Drejtorinë Vendore të Policisë Gjirokastër.

Nga veprimet e kryera nga grupi hetimor rezultoi se në brendësi të gomës rezervë kishte 14 pako me lëndë narkotike Cannabis Sativa, me peshë rreth 7 kilogramë gjithësej, e cila është sekuestruar në cilësinë e provës materiale, bashkë me automjetin.
Drejtuesi i mjetit është shoqëruar në ambjentet e Drejtorisë Vendore të Policisë Gjirokastër, ku në përfundim të veprimeve të kryera nga Specialistët për Hetimin e Narkotikëve u bë arrestimi në flagrancë për veprën penale “Trafikimi i narkotikëve”./Gazeta Express