Një 33-vjeçar është goditur për vdekje me thikë nga xhaxhai i tij, për shkak të një konflikti pronësie. Ngjarja ka ndodhur pasditen e së shtunës në qendër të qytetit të Shkodrës, në lagjen “Vojo Kushi”, shumë pranë teatrit “Migjeni”.
Bujar Kuçi, 62 vjeç ka goditur disa herë me thikë nipin e tij Mirsad Kuçi. 33-vjeçari është transportuar për në spital, por për shkak të plagëve të marra ka ndërruar jetë gjatë rrugës.
Ndërkohë, xhaxhai i tij është arrestuar nga policia, e cila është ende duke hetuar për shkaqet që kanë çuar në këtë ngjarje të rëndë.
Burime policore bëjnë me dije se shkak i konfliktit ka qenë pronësia e oborrit, pasi viktima dhe xhaxhai i tij ndanin të njëjtën çati, ndërsa banesat kishin hyrje të ndryshme.
Kanë qenë familjarët e viktimës ata që kanë lajmëruar policinë për ngjarjen, ndërsa 62-vjeçari nuk ka tentuar të largohej, por ka qëndruar në banesë duke pritur forcat e policisë.
Mësohet se Mirsad Kuçi ishte baba i dy fëmijëve të mitur dhe jetonte së bashku me babanë e tij. Ndërkaq, i arrestuari pritet të merret në pyetje për të shpjeguar me hollësi motivet e krimit dhe rrethanat që e çuan të godiste me thikë nipin.
Diskutime rreth kësaj post