Sherri i madh brenda “Foltores”, Kokalari në panik nga padia e Këlliçit, aktivistja i kërkon deputetit të tërhiqet pasi akuzat e saj i shërbyen PD dhe Berishës

Brenda “Foltores” së udhëhequr nga ish-kryeministri Sali Berisha, duket se ka plasur sherr i madh, ku protagonistë janë bërë besnikë të tij, sikundër janë kreu i Forumit Rinor të Partisë Demorkatike, Belind Këlliçi dhe aktivistja shqiptaro-amerikane, Evi Kokalari. Kjo e fundit ka sulmuar dje sërish deputetin demokrat Belind Këlliçi.

Përmes një postimi në rrjetet sociale, teksa ngre dyshime për shkollimin e tij në Amerikë, ndërsa e paralajmëron se po luan me zjarrin duke u përplasur publikisht me të. Po ashtu, ajo i kërkon Këlliçit të nxjerrë diplomat e tij për të vërtetuar përfundimin e gjimnazit në Shqipëri.

“O Belind, gabimi juaj kryesor është se nënvlerësoni zgjuarsinë time. Jam konsultuar me avokatët më të mirë të lobimit në Amerikë pikërisht që të jem e përpiktë me ligjin, dhe e tillë do ngelem deri në fund. Por ju turp t’ju vij sepse dhe të kisha thyer rregulla për të ndihmuar Sali Berishën dhe opozitën në Shqipëri gjatë një periudhe kaq të vështirë, kjo duhej të vlerësohej dhe jo të denoncohej. Ndërkohë të lutem më thuaj si je përgjigjur në aplikacionin e fakultetit në Amerike, kur je pyetur nëse e ke mbaruar gjimnazin? Nëse ke shkruar se ke diplome, të lutem na trego diplomën sepse më thonë Fultz është 5 vjet gjimnaz. Ti figuron të kesh bërë vetëm 4 vjet, dmth nga 2001 deri në 2005 që fillove shkollën në Amerikë, janë 4 jo 5 vjet. Si e justifikove apo ishte dhe ky manipulim faktesh? Nëse ke gënjyer, kjo përbën thyerje ligji jo vetëm për ty, por dhe për vëllain tënd që në atë kohë ka punuar në administratën e shkollës dhe mund të të ketë bashkëpunuar me ty për këtë manipulim. Nëse këto më lart vërtetohen, ndoshta duhet t’i shkruaj Bar Association nga ku varet dhe liçenca e tij. Dhe një gjë të fundit, herën e fundit që ti shkruajta këto më lart privatisht, më sule publikisht. Zgjuarsi nuk ke se po të kishe mënd nuk do luaje me zjarrin. I jeni futur një lufte e cila po ju vet-shkatërron. Mua nuk më dëmtoni”, shkruan Kokalari.

Kujtojmë se, kreu i FRPD-së dhe deputeti i Partisë Demokratike Belind Këlliçi më parë ka njoftuar se ka ngritur padi kundrejt Evi Kokalarit për shpifje. Me anë të një postimi në Facebook, deputeti i Partisë Demokratike Këlliçi ka deklaruar se shpifje dhe akuzave të Kokalarit nuk ka dashur tu përgjigjet në rrjete sociale, por me anë të një padie në Gjykatën e Tiranës.