“SHBA-të në kërkim të një jokeri për të zëvendësuar Ramën”, analisti: Mund të ketë koalicion PS-PD

Demokratët janë thirrur sot për të votuar për kryetarin e ri, përmes parimit “një anëtar, një votë”, procesi nuk ofron surpriza, pasi në garë përballë Lulzim Bashës, i cili ka drejtuar për tetë vite Partinë Demokratike është Gjergj Hani, një figurë e panjohur për këtë forcë politike.

Votimi i sotëm është cilësuar antistatutor nga Këshilli Kombëtar në mbledhjen e së enjtes, i cili anulloi mbajtjen e tyre dhe pezulloi njëherazi Kryesinë.

Nga ana tjetër edhe PS ka patur shumë ndryshime këtë verë, duke nisur nga skandali i ish-kryebashkiakut të Kukësit Safet Gjici, shpallja në kërkim ndërkombëtar e Arben Ahmetajt, shkarkimi nga detyra ministër i Brendshëm të Bledi Çuçit te ndyshimi i sekretaratit të PS-së.

Sakaq, në lidhje me situatën politike në vend, analisti Genc Burimi, ka bërë një parashikim të asaj që mund të ndodh pas zgjedhjeve të përgjithshme parlamentare të vitit 2025 në Shqipëri.

Në një intervistë të dhënë, Burimi tha se amerikanët janë në kërkim të një “jokeri” për të zëvendësuar kryeministrin Rama.

Sipas tij, për ta realizuar këtë po përdorin ish-kryetarin e Partisë Demokratike, Lulzim Basha.

Burimi theksoi se në 2025-ën, mund të ketë një koalicion të detyruar midis PS-së dhe partisë së Lulzim Bashës, me kushtin që kryeministri Rama të mos jetë shefi i qeverisë së ardhshme.

“Në zgjedhjet e vitit 2025 Partia Demokratike shkon e përçarë në zgjedhje. Në 2025, Lulzim Basha ka arritur të ngjizë më shumë vota rreth vetes dhe mund të kemi një koalicion mes partisë së Lulzim Bashës dhe PS-së. Atë koalicion që amerikanët e kërkuan pas zgjedhjeve të vitit 2021, por që Berisha nuk e lejoi. Ose në 2025-ën Lulzim Basha fiton i vetëm një mazhorancë, që për mua është e pamundur, pasi atë që nuk e bëri në 8-vite nuk mund ta bëjë në 2-vite, ose në të kundërt amerikanët do të urdhërojnë një koalicion mes Bashës dhe PS-së por pa Edi Ramën kryeministër. Jemi në kërkim të ethshëm nga amerikanët të një “jokeri” për të zëvendësuar amerikanët. Ky është leximi im, pasi Basha nuk mund të vijë i vetëm në pushtet, pasi Berisha e ka 25-30% të elektoratit të vetën.
Ose amerikanët mund të neutralizojnë dhe Metën e Berishën përmes SPAK-ut dhe i krijohen Bashës të gjitha kushtet që të rimarrë opozitën dhe të vijë në pushtet”, tha Burimi.