Reforma në drejtësi tremb LSI, Petrit Vasili shpërthen në akuza dhe kritika ndaj SPAK, i kërkon llogari për hetimet

Nënkryetari i LSI-së, Petrit Vasili përmes një deklarate për mediat ka hedhur akuza në drejtim të SPAK. Ai rendit një sërë çështjesh dhe kauzash për të cilat duhet të kishte folur drejtësia e re shqiptare, ndërsa sipas tij, SPAK ka heshtur në disa raste dhe kjo ngre pikëpyetje të mëdha.

Vasili ka hedhur akuza edhe në drejtim të qeverisë, duke thënë se qeveria po vjedh paratë e shqiptarëve pavarësisht problemeve që ka vendi për shkak të pandemisë dhe tërmetit.

“Sot jemi përpara disa fakteve të tmerrshme, fakteve që ulërijnë e për të cilat drejtësia e re nuk lëviz gishtin para pak ditësh është denoncuar një aferë e tmerrshme, ku paratë e qeverisë trajtohen si para xhepi të saj dhe ku qeveria nuk sillet si administratore, por si grabitqare. Ku ajo merr paratë nga një projekt i caktuar, i kalon si i do qejfi nga një krah tjetër, merr kredi dhe hua, pavarësisht se është një Shqipëri me probleme shumë të rënda pas tërmetit dhe pas pandemisë dhe qetësisht i kalon nga një rrugë te tjetra. Nuk lëviz as gishtin SPAK, ndërkohë që këto fakte i dinë të gjithë shqiptarët”, tha ai.

Ndër të tjera, ai u shpreh se SPAK duhet të veprojë kur faktet janë bërë publike, ndërsa akuzoi SPAK se nuk po heton dhe as nuk po dënon ata që vjedhin. Vasili vijoi më tej duke thënë se në këtë rast këto organe vendosen jo në shërbim të popullit, por kundër popullit.

“Çfarë prek ky SPAK-u i famshëm kur faktet ulërasin. Llogaritë e Shqipërisë po bllokohen nga EUROPOL-i në Austri e gjetkë në të gjitha anët, faktet buçasin. Boll SPAK u more me korrupsionin 20-30 mijë lekësh. Mos hetosh, mos paditësh, mos dënosh ata që grabisin miliarda nga paratë e popullit dhe i trajtojnë ata si miliardat e xhepit të tyre, do të thotë që edhe këto organe drejtësie kthehen dhe vendosen kundër popullit, sillen armiqësisht kundër tij. Sepse populli i paguan nga xhepat e tij, sepse nuk i paguan qeveria, por vetë populli, që të mbrojnë ligjin dhe të drejtën”, theksoi Vasili.

Sakaq, nënkryetari i LSI-së u shpreh se fakti që përpara drejtësisë nuk ka asnjë zyrtar apo ministër do të thotë sipas tij se drejtësia në këtë vend nuk funksionon. “Mos pasja e asnjë zyrtari, asnjë ministri dhe as të vet kryeministrit përpara drejtësisë është provë e një drejtësie e cila funksionon për të mbyllur korrupsionin, për të mbajtur gjallë pandëshkueshmërinë, për të krijuar dekurajim para shqiptarëve”, tha nënkryetari i LSI.