Rama publikon pamjet e një tjetër projekti dhe jep njoftimin e rëndësishëm: Do ndodhë për pak kohë (FOTO)

Kryeministri Edi Rama ka bërë publike pamjet nga një tjetër rikonstruksion. ”Kjo është Drejtoria e Shërbimeve të Transportit rrugor në Berat, ku për pak kohë hapet kantieri i godinës së re, pasi janë kryer të gjitha procedurat nga projektimi tek prokurimi”, shkruan Rama duke shtuar se ka vend për kritika. “I kuptoj shumë mirë padurimin, harresën po edhe kritikat e drejta për shumëçka duhet bërë edhe më mirë, por një gjë nuk do të lodhem së nënvizuari: Sot shtëpia jonë e përbashkët s’ka të krahasuar me dje, në asnjë aspekt dhe fakti që ne e dimë shumë mirë jo vetëm çfarë, po edhe si duhet bërë më tej, tregon se JO, NUK JEMI TË GJITHË NJËSOJ!”, shprehet ndër të tjera Rama.

Postimi i Ramës:

“Kjo është Drejtoria e Shërbimeve të Transportit rrugor në Berat, ku për pak kohë hapet kantieri i godinës së re, pasi janë kryer të gjitha procedurat nga projektimi tek prokurimi. E postoj këtu si një nga mijëra shembujt që duhet t’u kujtojnë disave se çfarë shtëpie me rraqe të vjetra, pisllëk e rrënim trashëguam shtate vjet më parë dhe se sa shumë gjëra kemi bërë, po bëjmë e duhet të bëjmë akoma, për ta sjellë të gjithën në terezi!

I kuptoj shumë mirë padurimin, harresën po edhe kritikat e drejta për shumëçka duhet bërë edhe më mirë, por një gjë nuk do të lodhem së nënvizuari:

Sot shtëpia jonë e përbashkët s’ka të krahasuar me dje, në asnjë aspekt dhe fakti që ne e dimë shumë mirë jo vetëm çfarë, po edhe si duhet bërë më tej, tregon se JO, NUK JEMI TË GJITHË NJËSOJ!

Se po të ishim njësoj, do ishte njësoj edhe shërbimi i transportit rrugor shqiptar, ku qindramijëra njerëz kanë pasur nevojën të ndalen për letrat e automjeteve të tyre dhe kanë mundësinë të bëjnë krahasimin, mes tmerrit të deridjeshëm në llumin e zullumin e këtij shërbimi publik, e transformimit shembullor që vazhdon sot.

*projekti bashkëlidhur, që shumë shpejt do të pasohet nga rindërtimi me themel i selisë qendrore të DPSHTRRSH-së, nuk është thjesht një godinë e bukur, po një nyje teknologjike shërbimi të standarteve europiane, në rrjetin e institucionit kampion të #RevolucionitDigjital ku qytetaret drejtues të automjeteve shërbehen pa zvarritjet e bakshishet e majme, që e bënin deri dje kampion të korrupsionit këtë institucion…” – shkruan Rama.

FOTO: