Rama ironi me Bashën: “S’kam shans të marr pushtet, dua vetting për lidhjet me krimin”

Kryeministri Edi Rama ka reaguar pas deklaratave të kreut të PD Lulzim Basha lidhur me vettingun në politikë.

Përmes një statusi në twitter, Rama ka ironizuar kreun e selisë blu i cili sipas tij kërkon që të bëjë vetting përmes thashethemeve për kundërshtarin.

Dhe për ta ilustruar këtë, Rama ka shkruar disa fjali pa kuptim logjik, për të ironizuar thashethemet që sipas tij Basha përdor për konsum politik.

“Ai krimineli është shoku i burrit të motrës së kundërshtarit tim. Mamaja e tij ka lidhje me tre komshi kriminelë. Krushku i njërit është trafikant që del i lidhur me kundërshtarin tim. Shans për të marrë pushtet me zgjedhje unë s’kam. Prandaj dua Veting për lidhjet e tij me krimin”, shkruan Rama.