Në Ditën e Europës, kryeministri Rama shprehu gadishmërinë për t’u ulur me Metën e Bashën në funksion të një unitetit në procesin e integrimit.
“Ne po përgatitemi për negociatat e anëtarësimit. Tani që kërkohet përgatitja serioze për konferencën ndërqeveritare, plani i punës është i detajuar dhe duhet të vazhduar të konsultohet hap pas hapi. Këtu duhen të gjithë aktorët, edhe pse qeveria mban peshën kryesore.
Ne jemi gati për t’u ulur në një tryezë të gjerë me presidentin, kryetarin e opozitës dhe të gjithë aktorët e tjerë përfaqësues të institucioneve të pavarura, në një tryezë ku të shprehim vullnetin e përbashkët, secili të bëjë detyrat e veta, jo për t’u imponuar të tjerëve që të bëjnë detyrat e tyre, por për një mesazh të fortë uniteti kombëtar në këtë proces, që deri më sot nuk më rezulton se ka një mendje tjetër”, deklaroi Rama në konferencën për shtyp në kuadër të Ditës së Europës.
Ndërkohë, duke iu përgjigjur interesit të një gazetareje mbi dy mbledhje të Këshillit të Sigurisë në kuadër të krizës epidemike, Rama gjeti rastin për të vlerësuar sërish atë çfarë ndodhi në ato mbledhje.
“Nëse gazetarja do të kishte parë tonin, kapacitetin dëgjues të të gjitha palëve dhe adresimin e çështjeve nga palët edhe për mosdakordësitë në Këshillin e Sigurisë Kombëtare do të thoshit: Uau! Politika shqiptare të arrijë vallë deri këtu? Nëse ai format etik dhe ajo atmosferë do të kalonte në pronësi të publikut dhe të ishte atmosfera ndërveprimit dhe e komunikimit mes palëve në publik, po ju them që Shqipëria do të dukej ku e ku më mirë.
Fatkeqësisht, në mjesidin publik politika rëndomë kthehet në vulgaritet e sherrnajë. I bën dëm të madh vetes, palëve, vendit dhe marrëdhënies së njerëzve me politikën.
Politika nuk ka lindur për ndonjë arsye tjetër përveçse për t’u dhënë njerëzve mundësinë që së bashku të bëjnë gjëra që vetëm nuk i bëjnë dot”, theksoi i pari i qeverisë. /tesheshi
Diskutime rreth kësaj post