Qeveria shqiptare e drejtuar nga Edi Rama ka vendosur të anulojë rritjen e pagave për mësuesit dhe punonjësit e shëndetësisë, që ishte parashikuar të niste nga data 1 korrik e këtij viti.
Rama ka vendosur të shkurtojë fondin përkatës buxhetin e shtetit.
Në buxhetin fillestar të miratuar në fillim të vitit, ishin përcaktuar 1 miliardë lekë ose 10 milionë dollarë për rritjen e pagave të 31 mijë arsimtarëve dhe 18 mijë mjekëve apo infermierëve në rang vendi, shkruan SYRI.net.
Sipas tabelave zyrtarë të buxhetit përmes këtij fondi do të rriteshin pagat me 5 për qind për të gjithë punonjësit e shëndetësisë dhe arsimtarët e të gjitha niveleve.
Por në Aktin Normativ, që miratoi në mbledhjen e fundit, ky vendim është shfuqizuar duke anuluar rritjen e pagave që duhet të hynte në fuqi nga data 1 korrik.
Më konkretisht anulimi i rritjes së pagave është bërë duke ndryshuar nenin 10 të buxhetit të shtetit.
Në ligjin fillestar, ky nen përcakton 1 miliardë lekë si politikë për rritjen e pagave në mesin e vitit 2018. Por me aktin normativ, ky zë është shkurtuar.
Historikisht, që nga rënia e komunizmit, të gjitha qeveritë i kanë rritur pagat në shtet çdo vit me një nivel dukshëm më të lartë se sa inflacioni.
Por që nga viti 2013, kur erdhi në pushtet qeveria aktuale pagat për punonjësit e sektorit publik janë ngrirë plotësisht. Në pesë vitet e saj në pushtet qeveria e Edi Ramës i ka rritur vetëm një herë pagat e administratës në vitin zgjedhor 2017, por kjo rritje nuk ishte mjaftueshme as për të kompensuar pjesërisht shtrenjtimin e ndjeshëm të çmimeve gjatë këtyre viteve.
Akti Normativ i miratuar dy ditë më parë vazhdon politikën e shtrënguar të pagave duke çuar në përkeqësimin e standardit të jetesës për punonjësit e administratës.
Sipas të dhënave zyrtare nga INSTAT, në 5 vitet e fundit çmimet janë rritur me mbi 15 për qind, ndërkohë që për të njëjtën periudhë qeveria i ka rritur pagat vetëm 5-7 për qind.
Kjo do të thotë se aktualisht punonjësit e administratës marrin një rrogë reale mesatarisht 7 deri në 10 për qind më të ulët nga sa merrnin 5 vjet më parë.
Në mandatin e parë qeveria e justifikoi ngrirjen e pagave si një kusht të vendosur nga Fondi Monetar. Por tashmë marrëveshja me FMN ka përfunduar dhe qeveria nuk ka asnjë detyrim për të ngrirë pagat, por e ka bërë këtë tërësisht me vullnetin e saj.
Foto:
Diskutime rreth kësaj post