Peticioni që trazoi gjumin e çadrës së vetmisë

Nga Flogert Muça/

Peticioni i qytetarëve dhe shoqërisë civile pro vetting-ut ka goditur rëndë të gjithë ata që reformën në drejtësi duan ta shohin të dështuar.

Pikësëpari, ky peticion ka goditur Lulzim Bashën dhe Sali Berishësn, të cilët ngritën në mes të bulevardit një çadër me pretekstin e zgjedhjeve të lira, por që në fakt për qëllim kishte bojkotin e parlamentit e bashkë me të, edhe të vetting-ut.

Dhjetëra mijëra firmat e qytetarëve që iu bashkuan kauzës së shoqërisë civile, duke firmosur në çdo cep të Shqipërisë, apo edhe online në shpëtovetingun.al dhanë një mesazh të qartë për Partinë Demkratike: Për aq kohë sa jeni kundër vetting-ut dhe reformës në drejtësi, jeni kundër shqiptarëve dhe Shqipërisë.

Sigurisht, çadra e bulevardit nuk mund të rrinte duarkryq dhe të shikonte se si dita ditës qytetarët braktsnin opozitën për t’iu bashkuar kauzës së vërtetë, reformës në drejtësi.

Fillimisht tentuan ta lidhnin lëvizjen qytetare me Partinë Socialiste dhe Edi Ramën. Por kuptuan se kjo nuk ishte strategjia e duhur. Edi Rama dhe 95% e shqiptarëve që duan reformën në drejtësi dhe vetting-un janë bashkë. Shoqëria civile nuk ka asnjë turp, e aq më pak Edi Rama dhe qeveria shqiptare, për të dalë hapur, në krah të njëri tjetrit, për një kauzë si drejtësia, që është shumë më e madhe se politika e ditës.

Partia Demokratike nuk e kupton se reforma në drejtësi ka të bëjë me të ardhmen e vendit. Prandaj shqiptarët, të majtë e djathtë pa dallim, e duan vetting-un e gjyqtaëve dhe prokurorëve, për të shporrur nga sistemi i kalbur çdo të korruptuar.

Mbrëmë, në një emision televiziv, gazetarët e çadrës anti-vetting u përpoqën të sulmonin peticionin qytetar, duke vënë kujën se një person paska firmosur disa herë, me emra të ndryshëm. A thua se peticioni në fjalë do të kishte ndonjë vlerë ligjore, përveç simbolikës për të treguar se shumica e shqiptarëve është bashkë në këtë kauzë madhore.

Të ashtuquajtur analistë, ish gazetarë të oborrit të Berishës, sot gazetarë të çadrës së Lulit, sulmuan ashpër përfaqësuesin e shoqërisë civile, që vet e kishin ftuar në emision. Nuk lanë fjalë pa i thënë një aktivisti, që ndryshe nga ata, nuk paguhet qindra mijëra euro nga paratë e vjedhura të Sali Berishës dhe Lulzim Bashës. Shanë e fyen një djalë të ri, i cili me pasion i është dedikuar plot kauzave të drejta, kundër qeverisë Berisha, por edhe kundër qeverisë Rama, siç ishte së fundi rasti i ligjit për importin e mbetjeve.

Armand Shkullaku dhe Ylli Rakipi duhet ta kuptojnë se të shkosh në çadrën e Lulit, është gjëja më e lehtë në botë. Sikundër është e lehtë të jetosh falë kontratave të majme të qerave, miliona e miliona euro çdo vit duke ndejtur në shtëpi.

Por diferenca mes Aldos, aktivistit të shoqërisë civile, dhe këtyre pseudo gazetarëve qëndron në një fakt të thjeshtë. Aldo ka mbi dhjetë vjet që aktivizohet në kauzat që ai vetë i konsideron të drejta. Kurse këta zanatçinj të vjetër, aktivizohen vetëm kur i thërret partia apo i mbarojnë paratë.

Dhe sigurisht, me vetting-un dhe reformën në drejtësi, nuk do shpëtojmë vetëm nga gjykatësit dhe prokurorët e korruptuar, por edhe politikanët dhe gazetarët e zhytur deri në fyt në afera që qelben erë./ Lexo.al