Kreu i Republikanëve Fatmir Mediu tha në ABC se Sali Berisha është mes dy njerëzve që vlerëson më shumë në politikë, por shtoi se kësaj herë nuk ka kërkuar mendim prej tij. Mediu theksoi që nëse kreu aktual i PD do e bindë se qëndrimi i tij po e dëmton opozitën atëherë do të tërhiqet nga ky qëndrim por shtoi se “Nuk mund të ecin në dy drejtime të kundërta që të rritet PD dhe të shkatërrohen partitë e tjera”.
“Unë kam dy njerëz që i vlerësoj shumë , i pari është Sabri Godo dhe kujtoj çdo fjalë të tij . I dyti është Sali Berisha me një lidership shumë të qartë. Është e rëndësishme që raporti politik të ketë edhe një raport njerëzor. Unë nuk i kam kërkuar mendim këtë herë por ne ruajmë raport miqësor. Një nga miqtë e mi më të mirë është z. Besnik Mustafaj. Raporti njerëzor është me shumë vlerë se shumë pak miq në politikë.
Unë nuk po kërkoj, por që bashkë me Bashën të gjykojmë si partitë tona të marrin fitoren. Atëherë Basha duhet të vijë të më thotë se kush janë pikat që na dëmtojnë. Nëse ai më thotë se kjo pikë e dëmton koalicionin unë do tërhiqem. Nëse kam vlerësuar diçka të shëndetshme në politikën e Lulzim Bashës është se ka mbajtur opozitën bashkë”, deklaroi Mediu.
Mediu tha prerë se në rast se nuk arrin negociatat me PD, nuk do të ketë asnjë opsion tjetër për marrëveshje me atë që quhet “opozita tjetër”, Astrit Patozin dhe Jozefina Topallin. Ai tha se e vlerëson Bashën në politikbërjen e tij për të mbajtur të bashkuar opozitën, por shtoi se negociatat nuk mund të bëhen në shtëpi por duke u ulur me palët në tryezë.
“Topallin dhe Patozin i kam pasur kolegë dhe i kam vlerësuar. Ajo që unë kam menduar është të vlerësoj atë që më ka dhënë çdo republikan, kam qenë deputet dhe ministër dhe kjo nuk është gjë e vogël. Pjesëmarrja sa më e gjerë opozitare duke i lënë menjëanë paragjykimet.
Marrëdhënie me PD ose PR vetëm, nuk kemi opsion tjetër. PR ka peshën e vet, nëse ajo nuk vlerësohet si duhet, do tregojë që ajo peshë është reale. PR për të organizuar njerëzit ka nevojat e saj për ta bërë sa më efektive këtë fushatë. Njeriu përgatitet për çdo gjë në jetë. Nuk mendoj se ka raporte të përhershme. Nëse është një sakrificë që ka të bëjë me Mediun le ta bëjmë.
Në historinë e këtyre 30 viteve nuk kemi pasur qeverisje kaq të korruptuar duke shkatërruar konceptin e shtetit. Shqiptarët kanë nevojë për atë programin ekonomik që thotë zoti Basha. Unë mendoj që në këtë kohë janë disa elementë të domosdoshëm në raportin elektoral. Ky realitet që ka ndërtuar Rama tregon se në çfarë terreni jemi.
Nuk mund të mbyllesh brenda shtëpisë tënde dhe të thuash këto janë negociatat. Duhet të ulesh me palët. Përgjegjësia e PD është për të pasur një raport sa më të drejtë dhe sa më transparent me të gjitha palët”, tha Mediu.
Diskutime rreth kësaj post