PD reagon për emërimin e kreut të ri të AMA: Rama shpërfilli ndërkombëtarët, qëllimi i tij është pushteti personal

Partia Demokratike ditën e djeshme ka reaguar lidhur me emërimin e Armela Krasniqit në krye të Autoritetit të Medias Audiovizive.

Ish-deputetja Albana Vokshi me anë të një deklarate për mediat u shpreh se falsiteti i kryeministrit Edi Rama me partnerët europianë, tashmë ka rënë. Sipas saj, injorimi i Ramës ndaj kërkesave të Bashkimit Europian dhe OSBE-së, tregon se prioriteti i tij është pushteti personal.

“Pas masakrës elektorale të 25 prillit perdja e falsitetit të Edi Ramës me shqiptarët, me opozitën dhe me partnerët europianë ka rënë. Për asnjë moment, Partia Demokratike nuk ka patur as iluzionin më të vogël se Edi Rama mund të tërhiqej nga rruga e tij antidemokratike për mbajtjen dhe kontrollin e çdo pushteti me çdo mjet! Me epilogun e turpshëm dhe arrogant, në injorim të plotë të kërkesës së Bashkimit Europian dhe OSBE-së për shtyrjen e procedurës për Parlamentin e ri, Edi Rama dëshmoi se prioriteti i tij kryesor nuk është integrimi europian, por pushteti personal”, – tha ajo.

Vokshi tha se Rama shpërfilli dhe turpëroi në mënyrë publike BE dhe OSBE duke shkuar kundër interesave të shqiptarëve. Ajo u shpreh se PD do të qëndrojë krah medias dhe të drejtave të qytetarëve për të mos lejuar regjimin të ketë pushtet mbi ta. Sipas saj, PD nuk do të lejojë që një kryeministër si Rama dhe regjimi i tij të ndikojë mbi liritë e fituara.

“Shpërfillja dhe turpërimi publik që Edi Rama i bëri dje Bashkimit Europian, OSBE-së dhe disa qeverive mike, shkon në drejtim të kundërt me interesin e shqiptarëve! Partia Demokratike do të qëndrojë në krah të gazetarëve për lirinë e medias dhe në krah të çdo qytetari për të drejtat e tyre. Bashkë me shqiptarët, e rrëzuam diktaturën 30 vjet më parë dhe nuk kemi për të lejuar një kryeministër si Edi Rama, që të na marrë liritë e fituara”, – u shpreh Vokshi.