Pasi refuzoi të plotësonte formularin e dërguar nga PD, Jozefina Topalli del me deklaratën e fortë: Basha të japë dorëheqjen

Ish-kryeparlamentarja Jozefina Topalli ka refuzuar të plotësojë formularin e vetëdeklarimit të dërguar nga PD.

“Partia nuk demokratizohet as me formularë, as me komisione. LB ka përçarë e shkatërruar PD-në. Ai nuk beson në asnjë parim të partisë që lindi 3 dekada më parë. Në këto kushte, nëse vërtet do donte largimin e Edi Ramës, LB duhet të largohet nga kryetari i partisë. Me një drejtim të ri të gjithë do bashkoheshin realisht pa formularë dhe pa komisione, dhe Rama nuk do të kishte më shans për të drejtuar vendin”, – tha Topalli për Top Channel.

Kritikja më e fortë e Lulzim Bashës ishte ndër emrat më të propozuar nga baza demokrate në Shkodër, ndërkohë refuzimi sjell automatikisht përjashtimin e saj nga faza e dytë e procesit të përzgjedhjes së kandidatëve të mundshëm të PD-së, pasi në udhëzimin e selisë blu parashikohet se mosdorëzimi në kohë i formularit të deklarimit nënkupton heqjen dorë nga mundësia për të qenë kandidat i mundshëm dhe Komisioni i Vlerësimit të Kandidatëve e heq personin e propozuar nga baza nga lista e kandidatëve, të cilët i nënshtrohen fazës së dytë.