Pas SHBA dhe Astrit Patozi kërkon kandidatë të pastër në 25 prill: Po të fusin si kriter korrupsionin, do të rrëzohej treçereku i listave

Pas ambasadores së Shteteve të Bashkuara të Amerikës në Tiranë, Yuri Kim dhe një sërë selish të tjera diplomatike në vend edhe kryetari i Bindjes Demokratike, Astrit Patozi ka kërkuar nga partitë politike që të kalojnë në skaner emrat që do të kandidojnë për deputetë në zgjedhjet parlamentare të 25 prillit.

Diplomatët e huaj në vendin tonë, si ambasadorja amerikane apo ambasadori i BE-së, vazhdimisht u kanë bërë thirrje partive politike që të sigurohen që kandidatët që duan të përfaqësojnë qytetarët, të mos jenë të përfshirë me krimin. Por në lidhje me këtë çështje, dje ka reaguar edhe zoti Patozi, i cili përmes një statusi në rrjetet sociale theksoi se duhet të bënin më mirë që të ndaleshin deri tek lidhjet e kandidatëve me krimin. Sipas Patozit, po të futet si kriter edhe korrupsioni, disa nga listat do të rrëzoheshin në treçerekun e tyre, ndërsa disa parti edhe mund të shkriheshin fare.

“Ambasadorët nuk e kanë keq. Ambasadorët nuk e kanë keq, kur i kujtojnë përditë partive se duhen të kenë lista të pastra për 25 prillin. Sepse me ato që u kanë parë sytë njerëzve në Shqipëri gjatë viteve të fundit, gjithçka mund të ndodhë edhe në këto zgjedhje. Por do të bënin më mirë që të ndaleshin deri tek lidhjet e kandidatëve me krimin. Sepse po të fusnin si kriter edhe korrupsionin, kam frikë se disa nga listat do të rrëzoheshin në treçerekun e tyre, ndërsa disa parti edhe mund të shkriheshin fare”, shkruan ndër të tjera në status kryetari i Bindjes Demokratike, Astrit Patozi.

Kujtojmë që vetëm pak ditë më parë ambasadorja e SHBA-së në vendin tonë Yuri Kim dhe ambasadori i BE-së Luigi Soreca zhvilluan një takim me kryekomisionerin Ilirjan Celibashi, ku në fokus të diskutimit ishte pastërtia e kandidatëve për deputetë në zgjedhjet e 25 prillit. Për rreth një orë ambasadorja Yuri Kim bisedoi me Kryekomisionerit Shtetëror të zgjedhjeve, Ilirjan Celibashi, me fokus përgatitjet për 25 prillin, por edhe çështjen e kandidatëve, për të cilën ambasadorja ka kërkuar prerazi nga krerët e partive të tregojnë përgjegjësi.

Ndërkohë edhe ambasadori britanik Duncan Norman u bëri thirrje një ditë më parë partive politike që duhet të sigurojnë që kandidatët që duan të përfaqësojnë qytetarët, të mos jenë të përfshirë me krimin e organizuar ose korrupsionin apo të lidhur drejtpërdrejt me ata që janë.