Zërat për ndryshime në qeveri po shtohen nga ditë në ditë. Teksa Asambleja e Partisë Socialiste po shtyhet dhe gjithë kabineti qeveritar është futur në skaner për punën e bërë deri tani, ministrat kanë filluar të dorëzohen. Ishte Besa Shahini ajo që pak ditë më parë paralajmëroi largimin e saj, duke thënë se nuk do të jetë më ministre e Arsimit.
Ndërkohë ditën e djeshme ka qenë ministri i Brendshëm, Sandër Lleshaj që ka paralajmëruar diçka të ngjashme. Lleshaj ka qenë dje në Vlorë për prezantimin e forcave të reja “Shqiponja”, nga ku ka deklaruar se nuk do të jetë më ministër. Kjo deklaratë vjen pak ditë pas zërave që qarkulluan në media për largimin e tij nga kabineti qeveritar. Ai është shprehur se ndihet i sigurt që nuk do të jetë më ministër.
“Nuk do jem i përhershëm në qeveri, është e sigurt se s’do të jem më ministër. Asnjë nuk është i përhershëm në një post”, deklaroi Lleshaj.
Gazeta e tha pak ditë më parë se ndryshimet në qeveri janë të mundshme. Ndërkohë Shahini e paralajmëroi me datë 7 shator. Ajo tha se do të largohet nga Shqipëria, pas përfundimit të këtij mandati qeverisës. Ajo njoftoi se ka vënë në dijeni edhe kryeministrin Rama për vendimin e saj. Ministrja ka theksuar se do të largohet nga Shqipëria për t’ju bashkuar familjes së saj në Kosovë.
“Unë tashmë kam njoftuar dhe kryeministrin Rama dhe kam marrë një vendim se nuk do të vazhdoj të qëndroj në Shqipëri përtej këtij mandati. Jeta ime është e paqëndrueshme në Shqipëri pasi familja ime jeton në Kosovë. Në këto momente kur ka probleme nga këto siç jemi ballafaquar është pak e vështirë. Por, i kam thënë se jam në dispozicion që të shërbej, por nuk do të përfshihem në fushatë elektorale”, tha ministrja e Arsimit.
Rama shtyu pa afat Asamblenë dhe pritet që në mbledhjen saj të ketë furtunë në qeveri e PS. Si duket disa emra që e dinë se do largohen kanë nisur t’i paraprijnë situatës.
Deklarata e Lleshajt
Dje në Vlorë Lleshaj së bashku me Drejtorin e Përgjithshëm të Policisë së Shtetit, Ardi Veliu prezantoi strukturën e re “Shqiponja”. Ai foli për përmirësim të të gjithë indikatorëve të cilët masin performancën e punës së policisë.
“Qëllimi është lufta e vendosur kundër krimit. Ndaj është nevojë e dorës së parë që policia të jetë e pajisur, e trajnuar etj. Ndërkohë sfida e re do të jetë luftimi i krimit edhe aty ku nuk ka qenë traditë e fortë. Kryesisht në fushën e krimit kibernetik dhe krimit ekonomik. Ndërsa ftoi të rinjtë e diplomuar në sektorët përkatës ti bashkohen radhëve të policisë”, tha ai.
Lleshaj komentoi edhe zhvillimet e OFL-së duke theksuar se pasuritë e krimit do të kthehen në asete publike. Sipas tij, Vlora nuk kryeson më në listën e qyteteve kryesore të kultivimit të lëndëve narkotike si rrjedhojë e punës së policisë. Sakaq Ardi Veliu deklaroi se forcat “Shqiponja” në Drejtoritë Vendore kanë si qëllim bashkëpunimin me qytetarët dhe krijimin e një strukture moderne.
“Për të rritur parametrat e sigurisë, ky është shembulli më i mirë se siguria është një sipërmarrje e përbashkët”, tha ai.
Më tej Veliu tha se strukturat që operojnë në Vlorë kanë përballuar me sukses luftën kundër kultivimit trafikimit të lëndëve narkotike në rrugë detare, përballimin e sezonit turistik dhe situatës së pandemisë.
Diskutime rreth kësaj post