Parashikimi i motit nga Shërbimi Meteorologjik në vendin tonë për ditët në vijim: Reshje të dendura dëbore që do arrijnë deri në 1 metër

Moti në vendin tonë këtë fundjavë do të jetë me shi dhe i ftohtë. Më poshtë, parashikimi i motit nga Shërbimi Meteorologjik Ushtarak:

Ditën e Shtunë vendi ynë do të ndikohet nga kalimi i një fronti të ftohtë atmosferik. Moti parashikohet i vranët shoqëruar me reshje shiu të herëpashershme dhe lokalisht të vazhdueshëm me intensitet të ulët deri mesatar.

Përgjatë vijës bregdetare dhe zonën e veriperëndimit reshjet në kohë afatshkurtër me intensitet deri të lartë në formën e shtrëngatave shoqëruar me shkarkesa elektrike. Në zonën e veriut në lartësitë mbi 300 metër reshje të dendura dëbore.

Edhe për ditën e Diel moti parashikohet i vranët shoqëruar me reshje shiu të herëpashershme me intensitet të ulët në të gjithë territorin.

Në zonën e jugut reshjet me intensitet mesatar në formën e shtrëngatave.

Në zonën e veriut në lartësitë mbi 300 metër reshje dëbore ndërsa në zonën e juglindjes në lartësitë mbi 1000 metër reshje dëbore.