Një parti që mezi pret ndarjen!

Nga Mero Baze

Duket se Lulzim Basha, mezi pret t’i heqë qafe dhe formalisht kundërshtarët e vet në PD. Ato po ashtu më në fund duket se kanë nisur të ndahen zyrtarisht prej tij. Në gjithë këtë skenar të parë e riparë disa herë nga vitti 1991, nuk ka ndonjë lajm të ri. Nuk përbën më debat fakti që Lulzim Basha do një parti për vete të vet dhe as ndonjë lajm të ri, fakti që çdo kundërshtar në PD, nuk rri dot brenda partisë, por nxitet të ik një orë e më parë.

Kështu ka ndodhur që me Aleancën Demokratike më 1992 e deri me Genc Pollon.

Lajmi real është se PD dhe Lulzim Basha humbën shansin të bashkojnë Partinë Demokratike që nga fraktura që ajo pësoi në Korrik të vitit 2013 kur Sali Berisha ndërhyri brutalisht në garën brenda PD kundër Sokol Olldashit dhe pro Lulzim Bashës, për ti lënë këtij të fundit PD-në.

Për të mos i ngrënë hakun Lulzim Bashës, ai nuk është fajtor për frakturën e PD, dhe ndarjen e madhe politike që ndodhi brenda saj në Korrik të vitit 2013.

Ndarjen e shkaktoi Berisha, pasi PD u ftoh me zgjedhjen e kryetarit, jo se e fitoi Basha por se e manipuloi me leje të Berishës. Meritë e Bashës është që ndarjen e thelloi dhe e përdori për të bërë një parti për vete.

Prej korrikut të vitit 2013, PD ka ikur gjithnjë e më poshtë si parti dhe si rezultat në zgjedhje.

Ndarja e fundit që duket në prag, është thjeshtë një vazhdim i ndarjes së nisur, e cila duke pritur gjatë për pesë vite, ka depozituar brenda saj dhe armiq të tjerë të Lulzim Bashës të gjetur gjatë rrugës. Virusi që shkatërroi zgjedhjet në PD më 2013, sot po shkatërron PD, si një mallkim nga bota tjetër e atij që hoqën qafe nga kreu i PD.

Lulzim Basha do të hyjë në histori si i vetmi kryetar i PD që, qysh prej ditës që e ka marrë vetëm ka zbuar njerëz prej saj, ka zbuar votues dhe militantë që e kanë dashur pa interes PD-në dhe e ka zvogëluar atë si numur, si peshë politike dhe si parti të djathtë.

Nuk di çfarë fati i pret kundërshtarët e tij, dhe nuk di sa i gëzuar është sot Basha, Grida, Saliani dhe shokët e tyre në PD, por nëse Berisha ka dashur vërtet një parti, më të vogël, më të lehtë për ta përdorur dhe më të pashpresë për të mos pasur kurrë fitues pas tij, ja ka arritur. E vërteta është se Basha nuk ngjiti dot në PD, dhe po nxjerr PD nga selia që ka zaptuar.