Një dremitje e vogël pas një turni të gjatë, historia e infermieres që preku botën mbarë, tani ka një fund të lumtur

Fotoja e saj, e mbështetur mbi një çarçaf pasi kishte shtyrë tutje tastierën e kompjuterit, pas një turni të lodhshëm në urgjencën e spitalit të Cremona-s, bëri xhiron e botës. U bë simboli i punës të palodhshme të personelit mjekësor të angazhuar me emergjencën Covid.

Fotoja u shkrep nga një doktoreshë, Francesca Mangiatordi, e prekur nga forca dhe humanizmi i asaj skene. Pesë ditë më pas, infermierja Elena Pagliarini, 43 vjeçe, rezultoi pozitive me koronavirus dhe nisi karantinën në shtëpi. Tani është mirë, tamponi i parë doli negativ dhe pritet përgjigjja e të dytit. Së shpejti pritet të rikthehet në krye të detyrës.

“E bëj me pasion punën, e bëj pa dashur të më falënderojnë”, -ishte shprehur infermierja gjatë një prej intervistave të shumta që iu kërkua të jepte pas asaj foto ikonë.

“Ajo foto tregon anën time të brishtë, sepse më parë kisha qarë nga pafuqia kundrejt asaj që po ndodhte” – tha ajo.