Dy ditë pasi Ministria e Arsimit u dërgoi universiteteve të dhënat për maturantët që duan të ndjekin studimet e larta, Fakulteti i Ekonomisë dhe ai i Drejtësisë kanë gati listat e fituesve dhe renditjen e aplikantëve sipas pikëve për raundin e parë.
“Në Fakultetin e Ekonomisë ka pasur 20 mijë e 416 aplikime, në vend të parë është administrim biznesi. Në Fakultetin e Ekonomisë nga 1280 kuota pa filialin e Sarandës, nëse regjistrohen të gjithë fituesit e shpallur sot na mbeten 395 kuota të lira. Janë të gjitha mundësitë që çdo kandidat me një mesatare të paktën mbi 7.5 të bëhet student në fakultetin e ekonomisë”, shprehet Dhori Kule, Dekan Fakulteti i Ekonomisë.
Njësoj si praktika e vitit të kaluar, për këtë raund të parë, kandidatët do të kenë në dispozicion 7 faza për t’u shpallur fitues. Dekani i Drejtësisë thotë se megjithë kërkesat e larta, mundësitë janë të mëdha
“Ne kemi 6435 aplikime. Nëse edhe sivjet do të regjistrojmë 400 studentë, mbeten 300-350 kuota të paplotësuara që do të plotësohen në fazat e tjera të raundit të parë”, thotë Artan Hoxha, Dekan Fakulteti i Drejtësisë.
Sipas udhëzimit të Ministrisë së Arsimit kandidatët kanë vetëm 48 orë kohë për t’u regjistruar nga njëra fazë në tjetrën, ndërsa mundësia e vetme për tu çregjistruar është data 12 shtator.
Universiteti i Tiranës: aplikimet 2017-2018
Fakulteti i Ekonomisë 20.416 aplikime
Administrim Biznes 6987
Financa 5500
Ekonomiks 4000
Informatika Ekonomike 4000
Filiali i Sarandës 92
395 kuota të paplotësuara
Fakulteti i Drejtësisë: 6435 aplikime
300-350 kuota të paplotësuara
Diskutime rreth kësaj post