Murrizi e Valteri pro shkarkimit të Metës: Largimi i presidentit do të thotë një hajdut më pak

Deputeti Myslim Murrizi gjatë fjalës së tij në Kuvend ditën e djeshme deklaroi se presidenti Ilir Meta duhet hetuar realisht. Murrizi u shpreh se për veprimet e presidentit ka faj dhe mazhoranca që ka heshtur lidhur me dekoratat dhe shtetësitë. Ai tha se do të jetë pjesë e Komisionit Hetimor për të parë seriozitetin e nismës për shkarkimin e presidentit dhe verifikimin e veprimeve të tij gjatë 30 ditëve. Sipas tij nëse Kuvendi dhe gjykata do të vendosë, vendi do të ketë një hajdut më pak.

“A duhet hetuar realisht Ilir Meta? Kam vënë re që ju keni heshtur. 700 shtetësi dhe dekorata pa fund. Ka dekoruar xhelatë të ish-Sigurimit të Shtetit dhe asnjë fjalë s’keni thënë. Se për çfarë duhej dhënë shtetësia për kriminelë vetëm ai mund ta dijë. Do të jem në këtë komision për të parë se deri ku shkon serioziteti i asaj që artikuloi këtu Balla, por edhe për të parë se çfarë ka bërë realisht ky president gjatë 30 ditëve. Shpresoj të jetë një ogur i mirë. Dhe nëse Kuvendi dhe gjykata do të vendosë, mua si Myslim them se do të na bëjë mirë një hajdut më pak. Burgu i Reçit do të jetë mikpritës për 30 vetë që bëjnë sikur i duan shqiptarët. Ishalla e keni seriozisht dhe nëse kjo kokërr tespihe shkëputet, do këtë nga grupi jot si tespihe për të shkuar drejt Reçit”, tha ai.

Po ashtu edhe deputeti Halit Valteri deklaroi se presidenti për shkak të të gjitha krimeve që ka kryer duhet të ishte bërë subjekt i drejtësisë. Ai u shpreh se shkarkimi i Metës është një akt i lartë për t’i dhënë vendit atë që i takon. Sipas tij është turp që Meta të thirret President i Republikës.

“Ai duhet menjëherë të jetë subjekt i drejtësisë shqiptare për krimet e shumta që ka kryer. E pakuptueshme se si karriera e këtij njeriu është ngritur deri te President i Republikës. Shkarkimi i tij është një akt i lartë, por më i vogli që mund të bënim. T’i japim vendit atë që i takon. Boll më me kalkulimi politike. Ai duhet të ishte dënuar që kur lëpinte gishtat kur numëronte lekët në videon e Dritan Priftit. Ky është turp të thirret Presidenti i Republikës, ku duhet të thirret Presidenti i rakisë ose Presidenti i qofteve”, tha Valteri.