Parlamenti Europian ka ndezur dritën jeshile për hapjen e negociatave përfundimtare mes Shqipërisë dhe Maqedonisë së Veriut. Pas diskutimeve të bëra dy ditë më parë, dje eurodeputetët kanë rënë të gjithë dakord që vendi ynë i ka përmbushur kushtet dhe tashmë ministrat e BE duhet të vendosin datën për mbajtjen e mbledhjes së parë ndërqeveritare. Deputetët e Parlamentit Europian e kanë vendosur theksin tek reformat në sistemin e drejtësisë që të jenë të pakthyeshme sepse ato janë një prej kushteve kryesore për përparim në procesin e integrimeve.
Në dokument u listuan një sërë çështjesh, ku në krye qëndronte procesi zgjedhor. Raporti u përpilua nga raportuesja Isabel Santos dhe iu nënshtrua amendamenteve nga David Lega i PPE. Eurodeputetët kërkuan që zgjedhjet e 25 prillit në Shqipëri të zhvillohen sipas standardeve demokratike. Ata theksuan se zgjedhjet e prillit do të jenë një test për konsolidimin e procedurave demokratike në vend dhe arritjes së stabilitetit të qëndrueshëm politik. Komisioni kërkoi nxitje ndaj udhëheqësve për të krijuar një klimë besimi dhe transparence tek qytetarët. Po ashtu më tej theksohet rëndësia e zbatimit të masave të reformës zgjedhore.
“Zgjedhjet e përgjithshme të 25 prillit 2021 do të jenë thelbësore për konsolidimin dhe rinovimin e procedurave dhe strukturave demokratike të vendit si dhe të arrijë një nivel më të lartë të stabilitetit politik nënvizon atë të lirë dhe të drejtë. Zgjedhjet janë thelbësore për integrimin në BE. Theksohet nxitja ndaj udhëheqësve politikë për të krijuar një klimë besimi nga rritja e transparencës dhe tejkalimi i mungesës së dialogut dhe shpreh shqetësimin e tij serioz në lidhje me klimën politike të polarizuar dhe mungesën e bashkëpunimit ndërpartiak që vazhdojnë të pengojnë procesin demokratik. Për Shqipërinë, disa shtete anëtare kanë kërkuar të shohin më shumë përparim në reforma, luftë kundër krimit të organizuar dhe korrupsionit dhe të shohin se si do të zhvillohet procesi zgjedhor”, thuhet në rezolutë.
Në raportin për Maqedoninë e Veriut u kërkua që të vazhdohen përpjekjet për forcimin e demokracisë, për luftën kundër korrupsionit dhe përmirësimin e gjendjes të lirisë së mediave dhe shoqërisë civile. Eurodeputetët kanë shprehur mirënjohje për përkushtimin konstruktiv të Maqedonisë së Veriut për raporte të mira fqinjësore, përfshirë edhe zbatimin e Marrëveshjes së Prespës dhe në të njëjtën kohë kanë shprehur keqardhje për mungesën e një zgjidhje të çështjeve të hapura mes Maqedonisë së Veriut dhe Bullgarisë.
PE-ja u ka bërë thirrje të dyja vendeve që përmes dialogut konstruktiv të kërkojnë një kompromis. Të dyja këto shtete kandidate janë në pritje të nisjes së negociatave të anëtarësimit në Bashkimin Europian. Këshilli i BE-së mori vendimin që të nisin bisedimet, por nuk është caktuar ende një datë se kur do të ndodhë një gjë e tillë. Në rastin e Maqedonisë së Veriut kjo është bllokuar nga Bullgaria, e cila ka parashtruar kërkesa që kanë të bëjnë me historinë dhe identitetin, për të cilat ka interpretime të ndryshme në Shkup dhe Sofje.
Diskutime rreth kësaj post