Në kuadër të vizitës në New York, Ministrja e Drejtësisë, Etilda Gjonaj u prit në një takim nga Presidenti i Asamblesë së Përgjithshme të Kombeve të Bashkuara, z.Volkan Bozkir. Presidenti Bozkir përgëzoi Ministren Gjonaj për vullnetin dhe angazhimin e Qeverisë Shqiptare në luftën kundër korrupsionit, e shprehur në fjalën e saj në sesionin e posaçëm të Asamblesë së Përgjithshme.
Zoti Bozkir nënvizoi se deklaratat politike të mbajtura gjatë sesionit nga vendet anëtare të OKB-së tregojnë angazhimin e qeverive në luftën kundër korrupsionit. Ministrja Gjonaj shprehu falenderimet e saj për organizimin për herë të parë të këtij sesioni nga OKB duke theksuar rëndësinë e përfshirjes në agjendën e Kombeve të Bashkuara të luftës kundër korrupsionit, për shkak të impaktit të drejtëpërdrejtë që sjell korrupsioni për paqen dhe sigurinë e vendeve anëtare veçanërisht kur ndërvepron me krimin e organizuar.
Ministrja Gjonaj theksoi se tashmë lufta kundër korrupsionit duhet konsideruar nga shtetet si një çështje përtej kufijve kombëtare dhe për këtë arsye bashkëpunimi midis tyre është shumë i rëndësishëm. Ministrja Gjonaj i bëri me dije Presidentit Bozkir se Qeveria Shqiptare ka në prioritetet e saj kryesore konsolidimin e shtetit ligjor, nëpërmjet reformimit të sistemit të drejtësisë ashtu si edhe në luftën kundër korrupsionit, për të cilat janë arritur rezultate domethënëse.
Pjesë e diskutimeve të këtij takimi ishin edhe hapat përpara që Shqipëria ka bërë në kuadër të procesit të integrimit evropian. Presidenti Bozkir inkurajoi ministren Gjonaj, për të vijuar zbatimin e reformave të ndërmarra, me theks të veçantë atë në Drejtësi, pavarësisht sfidave për të garantuar të ardhmen e qytetarëve.
Postimi i plotë:
“Kënaqësi e veçantë të takohesha me Presidentin Volkan Bozk?r, me të cilin pata mundësinë të bisedoja për rëndësinë e sesionit të posaçëm të Asamblesë së Përgjithshme të OKB-së për luftën kundër korrupsionit.
Gjatë takimit, i shpreha presidentit Bozk?r, rëndësinë e përfshirjes në agjendën e Kombeve të Bashkuara si prioritet luftën kundër korrupsionit, për shkak të impaktit të drejtëpërdrejtë që sjell në paqen dhe sigurinë e vendeve anëtare veçanërisht kur ndërvepron me krimin e organizuar.
Bashkëpunimi midis shteteve konsiderohet i rëndësishëm pasi lufta kundër korrupsionit nuk është më vetëm një çështje që qëndron brenda kufijve kombëtarë.
Në këtë takim, ritheksova prioritetet e Qeverisë Shqiptare për konsolidimin e shtetit ligjor, nëpërmjet reformimit të sistemit të drejtësisë ashtu si edhe në luftën kundër korrupsionit, për të cilat janë arritur rezultate domethënëse. Presidenti Bozkir inkurajoi vijimin e zbatimit të reformave të ndërmarra, me theks të veçantë atë në drejtësi, përtej sfidave që duhet të përballojmë, me qëllim garantimin e të ardhmes së qytetarëve.“-shkruan Gjonaj.
Diskutime rreth kësaj post