Ministria e Brendshme ka reaguar mbi kontrollet e ushtruara nga Policia e Shtetit brenda kampit të MEK në Manzë të Durrësit, ku ka bërë me dije se nuk ka humbje jete dhe as të lënduar.
Sipas Ministrisë, Operacioni i Policisë është në zbatim të urdhrit të SPAK dhe vendimit të GJKKO, ndërsa shton se veprimet e grupimit të MEK kanë rënë ndesh me marrëveshjen e 2014, sipas së cilës do vendoseshin në Shqipëri për qëllime humanitare.
“Operacioni i sotëm i Policisë së Shtetit në vendqëndrimin e MEK në Manëz të Durrësit është në zbatim të plotë të urdhrit të SPAK dhe vendimit të Gjykatës së Posaçme kundër Korrupsionit dhe Krimit të Organizuar.
Vendimi i Gjykatës është pasojë e veprimeve që bien haptazi ndesh me marrëveshjen dhe angazhimet e marra nga grupimi MEK prej vitit 2014 kur u vendosën në Shqipëri vetëm për qëllime humanitare. Fatkeqësisht ky grupim nuk iu është përmbajtur këtyre angazhimeve duke thyer marrëveshjen. Ndërhyrja e Policisë së Shtetit ka qenë konform ligjit dhe në zbatim korrekt të procedurave që kërkojnë operacione të tilla. Veprimet e Policisë së Shtetit për zbatimin e ligjit janë kryer si në çdo pjesë tjetër të territorit të Republikës së Shqipërisë”, thuhet në njoftimin e Ministrisë së Brendshme.
Brenda kampit, Policia e Shtetit ka hasur në rezistencë nga banorët, çka sipas Ministrisë, bie ndesh me kuadrin procedural të zbatimit të ligjit.
“Fatkeqësisht brenda kampit ka pasur rezistencë ndaj kryerjes së punës së Policisë së Shtetit, çka bie ndesh me kuadrin procedural të zbatimit të ligjit. Bazuar në të dhënat e Policisë së Shtetit, gjatë operacionit nuk ka pasur humbje jete dhe as të lënduar. Për çdo pretendim për humbje jete në spitalin e vendqëndrimit të tyre po bëhen të gjitha verifikimet proceduriale”, thuhet në njoftim. Reagimi i Ministrisë erdhi pas pretendimeve të banorëve të Ashrafit se ka të vrarë nga përplasja me Policinë.
Diskutime rreth kësaj post