Manjani shpërthen ndaj qeverisë dhe zbulon veprimin urgjent që duhet bërë kundër COVID-19

Ish-ministri i Drejtësisë Ylli Manjani i konsideron idiote masat e marra nga qeveria për parandalimin e përhapjes së koronavirusit.

Sipas Manjanit, këto masa nuk kanë lidhje fare me përhapjen e virusit, pasi sipas tij ai ka hyrë në vendin tonë shumë kohë para izolimit dhe tashmë është drejt largimit.

Ish-ministri shkruan se tani është pikërisht koha që të bëhen testime në mënyrë që të shikohet sa ka shkuar përhapja që të fillojë gradualisht edhe dalja nga izolimi.

Postimi i Manjanit:

“Cili komitet teknik e shpjegon logjikën që pas gati 40 ditëve izolim ekstrem, ka të infektuar të rinj dhe nga qytete të tjera përveç Tiranës e Durrësit?!

Jo për gjë po kur dëgjoj dhe mjekë që thonë se masat e Kryeplakut e ndaluan përhapjen, më vjen për të vjellë!

Ja sa bukur e kanë ndaluar përhapjen! Përditë konstatohen raste në qytete të tjera.

Kjo tregon se virusi ka qenë dhe mbetet midis nesh, pavarësisht llogjikës së kalbur të shifrave zyrtare. Virusi ishte prezent që në fillim të vitit, siç dëshmojnë njerëz të gjallë dhe siç e pranoi edhe zonja Bino. Tani është në një valë të dytë ose ndoshta të tretë goditje.

Shqiptarët e kaluan e po kalojnë si çdo virozë tjetër. Ato që nuk arritën ta kalojnë janë më shumë sesa ato që mbetën në spital, por qartësisht shumë më pak sesa ato që janë shëruar.

Pra masat ekstreme janë IDIOTE, në mos të LIGA! (Po lë mënjanë kushtetutshmërinë, për efekt të argumentit)

Qartësisht, këto masa, nuk kanë lidhje me ndalimin e përhapjes së virusit. Jo ëeekend-et, por edhe gjithë javën ta mbyllin nuk e kontrollojnë dot më. Sepse asnjë ditë të vetme nuk e ndaluan dot virusin. Ai(virusi) shëtiti për qejf të vet gjithë këto kohë. Tashmë është duke u zbythur…

Kur mendoj që u bë një kongres dhe një miting në kulmin e inkubacionit, që kufinjtë ishin të hapur dhe asnjë kontroll mjekësor nuk bëhej, them se qartësisht qeverisemi nga të papërgjegjshëm!

Kushdo që ende ndjehet si një prej atyre 18 000 dëshmorët virtualë, por që e ka jetën prej këtyre të papërgjegjshmëve, nuk bëhet më! Vështirë të ketë më spital psikiatrie ti marrë në dorëzim…

Të shpresojmë që të paktën të fillojnë ndonjë test real, që të hapet jeta. Siç po bëjnë të gjithë shtetet e dëmtuara realisht nga COVID.”, shkruan Manjani.