Gjykata Kushtetuese do të kthejë përgjigje në një kohë sa më të shkurtër për ligjin e Vetting-ut, por përgjigja zyrtare nga Komisioni i Venecias ende nuk i është vënë në dispozicion kësaj gjykate.
Kryetari i Kushtetueses, Bashkim Dedja, në një intervistë për Ora News thotë se sot e kësaj dite Opinioni i Komisionit nuk ka ardhur zyrtarisht në Gjykatën Kushtetuese.
“Akoma nuk kemi një përgjigje zyrtare, ndonëse e ka botuar në faqen e saj elektronike. Ne kemi komunikuar edhe dje dhe sot me Komisionin dhe para pak çastesh më është kthyer përgjigja se ka pasur një problem teknik që nuk është dërguar dhe mund ta nisin që sot në rrugë elektronike dhe manuale. Jemi në pritje të opinionit, zyrtarisht”, tha kryetari Dedja.
Duke iu përgjigjur akuzave për zvarritje dhe vonesa në shqyrtimin e kësaj çështje shumë të ndjeshme dhe të rëndësishme për reformën në drejtësi, Dedja sqaron publikun duke thëne se shqyrtimi i ligjit të Vetting-ut është bërë në një kohë rekord.
“Kërkesa është regjistruar më 5 tetor në Gjykatën Kushtetuese, Kolegji ka vendosur më 14 tetor duke e kaluar çështjen për gjyq, ndërkohë që është marrë vendimi për t’i dërguar Komisionit të Venecias me datë 25 tetor nga mbledhja e gjyqtarëve dhe për t’i kërkuar mendim. Seanca gjyqësore është bërë pa kaluar një muaj nga depozitimi i kërkesës. Nuk është Gjykata Kushtetuese që e ka zvarritur, përkundrazi ka punuar me shpejtësinë maksimale për t’i dhënë përgjigje sa më shpejt pretendimeve të ngritura të këtij ligji. Gjykata Kushtetuese po punon maksimalisht që t’i japë një përgjigje sa më të shpejtë me vendim përfundimtar kësaj kërkese, që ka të bëjë me thelbin e reformës në drejtësi”, tha Dedja.
Ai thekson se Kushtetuesja nuk është bërë dhe nuk do të bëhet kurrë pengesë për integrimin e vendit dhe reformën në drejtësi, përkundrazi, është një kontribuese jashtëzakonisht e rëndësishme e demokracisë në vend. Dedja në intervistën e tij i bën thirrje politikës dhe mediave që të heqin dorë nga presionet që i bëjnë Gjykatës Kushtetuese, sepse gjyqtarët e saj janë shtetas të këtij vendi dhe janë të përgjegjshëm për detyrën e tyre. Ata do te vendosin për më të mirën e asaj që kërkohet. Gjykata Kushtetuese i nënshtrohet Kushtetutës dhe do ta mbrojë atë sipas rregullave dhe ligjeve që janë në fuqi dhe Konventave Ndërkombëtare, nenvizoi kryetari Dedja.
Diskutime rreth kësaj post