Me kë je ti “shozo” Sali?!

Nga Anri Bala

Kur të pash me “28 Nëntor”, tek varrezat e dëshmorëve të atdheut, mu shqyen sytë nga habia. Nuk po i besoja dot vetes nëse ishe ti, apo unë isha në endërr?! Mendova nga tejlodhja në punë, po më bën ndonjë rreng truri! Por kur pash “eunukun” tënd pranë teje, aty u kthjellova, po prapë mezi erdha në vete.

Nuk e kuptova, se çfarë pune kishe ti tek përmendorja e “Nënë Shqipëri”, me yllin partizan mbi shqiponjë?! Ti “demokrat” i thekur dhe i “devotshëm”, nuk mund t’i tradhëtosh idealet e demokratëve dhe t’i fyesh duke nderuar vëllezërit, etërit, bijtë e komunistëve, ose të “qelbësirave” siç i thërret ti, të gjallë e të vdekur. Ti veç i thërret, se asgjë nuk u bëre dot atyre kur i kishe në dorë, jo më tani që s’ke asgjë.

Ti e di shumë mirë, se aty nuk ka dëshmor të “kastës” tënde, sepse ti je ballist, zogist, nacionalist dhe më shumë i persekutuar me varkë dhe si varkar, troç i përdorur si shërbëtor. Por kur do të shesësh mend ti, je ai që je në të vërtetë… komunist e bir komunisti.

Them je dhe komunist, sepse nuk e kuptova, se përse ishe aty?! Natyrisht, kur ishe kryeministër dhe president, t’a donte detyra shtetërore, por tani përse bënë qoka duke fyer tarafin tënd politik?! Ti së bashku me shokët e tu “demokomunista” mund të shkonit në Lushnje, tek të afërmit e nacionalistëve të dekoruar nga kapterri yt, si dëshmor. Mbase unë nuk kam të drejtë t’i gjykoj, se jam shumë i ri për të qenë historian, por siç duket, ti as që i beson ato që bënë Jari dhe nuk lëviz nga istikami si komunist duke i fyer ata, me nderimin që u bënë kundërshtarëve të tyre.

Ti mund të shkoje edhe tek familja Vokshi, tek “demokratja e madhe” Albana, për të kujtuar Heroin e Popullit, komunistin Asim Vokshi. Por ti zgjodhe e shkove tek varrezat e atyre, që ti i njeh dhe nuk i njeh si dëshmor të vërtetë, për t’u tallur, duke i sfiduar  ata edhe të gjallët,  si  “hero” i vetëm i këtij vendi. Ashtu si në parlament e kishe akoma dhe një merak, se nuk të zinte gjumi pa i’u a thënë dhe atyre: Jam Sali Berisha o të vdekur!

Të them të drejtën, Asimi kur të pa tek vendosje kurorë, i’u drodh varri, jo nga frika e gojës tënde pa fre, por se nuk kishte mundësi të çohej dhe të të fuste një të pështyrë me gjak në fytyrë dhe ta përplaste kokën tek “Nëna Shqipëri”, si hakmarrje për sharjet dhe fyerjet me xhins e me rracë, që t’i u bënë çdo ditë, sepse ai i mat gjërat me metrin e komunistit dhe ti, për të gjithë ata aty je tradhëtar i kombit, i pabesë dhe sharlatan politik.

Përsëri nuk më hiqet nga mendja, pyetja: Përse ishe atje, me çfarë tagri dhe qëllimi?! Deshe të sfidoje historianët se çlirimtari je ti, “Askushi”. Apo doje të fyeje ata që të bëjnë fresk, se ti nuk je as Ballist e as Zogist, as shok e as zotëri, por një “shozo” hibrid që askush nuk të parashikon dot dhe morali yt është pamorali.

Nëse kisha respekt për nacionalistët e vërtetë, jo kolaboracionistët që kanë vrarë shumë nga ato djem, që ti i fyeve me nderimin tënd prej hipokriti, duke i futur dhe ata në vathën tënde të hipokrizisë.

Po si ore, nuk dëgjova asnjë ballist, zogist, legalist të ulurinte dhe të qëllonte me grusht në fytyrë, kur ti i harrove deri në përbuzje. Siç duket, ata nuk e dinë, ose nuk i’ua ka thënë njeri, se edhe mes tyre ka pasur dëshmor, atdhetar, idealist, patriot, që nuk bashkëpunuan me pushtuesit, por sot ty “shozo” as që të ra ndërmend për ta.

Ti kishe hallin e kungulleshës, 28 apo 29, sepse kaq vlen. Ty kurrë nuk të ra ndërmend, kur ishe në majat më të larta të pushtetit, që eshtrat e këtyre dëshmorëve dhe patriotëve të preheshin aty, bashkë me dëshmorët me yll dhe atëherë, kur të vdekurit që dhanë jetën për atdhe të ishin bashkë, të gjallët do të shkonin t’i nderonin siç e ka zakon shqiptari.

Mirëpo, ti ke mbijetesë konfliktin, ndarjen, urrejtjen dhe herë pas here nxjerr kokën nga skuta djallëzore e poshtërsive. Kjo ishte intriga jote e radhës dhe unë që nuk jam i zoti në zbulimin e intrigave, nuk po më zë vend pa të pyetur: Me kë je ti “shozo” Sali?!/Tellalli.al/