Kandidati i Koalicionit “Bashkë Fitojmë” për bashkinë e Kuçovës, Lefter Maliqi, ka deklaruar sot se mandati i tij u vodh dhe se do bëjë kallëzim në SPAK për atë që e quajti krim elektoral në KZAZ 64.
Në një deklaratë për mediat Maliqi ka denoncuar vjedhjen e hapur të votave nga komisionerët e PS-së, policia dhe eksponentë të krimit në qytetin e Kuçovës. Kujtojmë se Maliqi ishte pranë fitores, por momentin e fundit rezultati ndryshoi në favor të rivalit socialist, i cili mori një mandat të dytë.
“Votat e mia shprehën vullnetin e lirë të qytetarëve të Kuçovës, pa dallim politik. Mandati im u vodh dhe u manipulua nga bandat e Çuçit dhe oligarkut Salillari. Mbrëmjen e numërimit, komisionerët lanë KZAZ-në për 90 minuta vetëm, ku kutitë e votimit u ndërruan brenda ambienteve të KZAZ-së, që kishte lidhje me Qendrën Kulturore të bashkisë nëpërmjet një dere lidhëse nga pjesa e kutive. Ne kemi verifikuar se vulat e kutive mungojnë dhe disa vula nuk korrespondojnë me vulën e KQZ-së. Po kështu, fletët e votimit në kuti nuk korrespondojnë me numrin e votuesve. Ne kemi grumbulluar të gjitha provat dhe do denoncojmë këtë krim elektoral në KQZ dhe SPAK, në mënyrë që kriminelët e votës së lirë të ndëshkohen dhe vullneti i popullit të vihet në vend”, ka thënë Maliqi.
Diskutime rreth kësaj post