Pushtetarët shqiptarë dhe bosët e krimit kanë nxjerr jashtë vendit me miliona euro. Çdo vit në raportet ndërkombëtare shihet si shqetësim pastrimi i parave, por vitet e fundit ka pasur rritje të ndjeshme të transfertave në shtete të ndryshme të botës. Gazeta prej disa javësh ka bërë një sërë kërkimesh, duke deklaruar se Drejtoria e Pastrimit të Parave po kërkon informacione në shtete të ndryshme. Por tashmë kanë dalë dokumentet zyrtare, në të cilat tregohet se cilat vende preferojnë shqiptarët për pastrim parash. Bëhet fjalë për një sërë raportesh të publikuara nga Task Forca e Veprimit Financier, e njohur si FATF, organizata më e madhe ndërkombëtare e krimit ekonomik dhe financimit të terrorizmit. Çdo vit ajo nxjerr të dhëna për secilin shtet. Gazeta ka bërë një kërkim në raportet e vitit 2017 dhe të 2018 për disa shtete të botës dhe në 5 prej tyre përmendet Shqipëria.
Sipas të dhënave të nxjerrja nga kjo organizatë, disa nga shtetet ku shqiptarët kanë fshehur para janë: Meksika, Britania e Madhe, Namibia, Nigeria dhe Saint Lucia. Në raportet e FATF thuhet se sa i takon Meksikës, së fundmi aty ka pasur një kërkesë nga Drejtoria e Përgjithshme e Parandalimit të Pastrimit të Parave, e cila ka kërkuar informacione për një rast të transfertave të dyshimta në këtë shtet. Por ajo që bie në sy është se së fundmi po shihen si destinacion dhe shtetet afrikane. Dy vendet më të përdorura janë Namibia dhe Nigeria. Sa i takon kësaj të fundit, arsyeja kryesore është sundimi i dobët i ligjit. Por përveç kësaj, gazeta ka mësuar nga Drejtoria e Pastrimit të Parave se ditët e fundit në Namibi është nisur një kërkesë për informacion mbi një pushtetar shqiptar. Një tjetër destinacion është dhe ishulli Sant Lucia, i cili ndodhet në Amerikën Jugore, ku po ashtu thuhet se ka pasur transferta nga Shqipëria.
Britania në krye të listës
Vendi ku dominon fshehja e pasurive nga pushtetarët dhe kriminelët shqiptarë është Britania e Madhe. Por një fakt tjetër është se përdoret dhe për pastrim parash. Në raportin e nxjerrë për këtë vend, jepen dhe shembuj se si bëhet pastrimi i parave. Në një rast autoritet londineze kanë treguar dhe përfshirjen e bandave dhe trafikantëve të drogës. “Një bandë shqiptare trafikantësh që operonte në Londër, përdorte disa lloje agjencish konvertimi për të kthyer sterlinat në prerje të mëdha euro. Kartëmonedhat euro më pas fshiheshin në automjete dhe dërgoheshin në vendin e tyre. Ata kishin krijuar lidhje me dy vëllezër shqiptarë që zotëronin internet kafe në Londër, të cilët kishin hapur kioska konvertimi parash në dyqanet e tyre dhe njerëz që vepronin për llogari të tyre. Kur pronarët shihnin se identifikoheshin nga autoritetet, ambientet mbylleshin me shpejtësi dhe biznesi çregjistrohej.
Në 2015 agjencitë evidentuan nevojën e grupeve kriminale për të dërguar para jashtë vendit, me qëllim pagimin e furnitorëve. Ky rrezik mbetet i lartë. Paratë CASH zakonisht transportohen jashtë Britanisë me mjete të rënda, në mjete pasagjerësh apo udhëtime ajrore të linjave komerciale”, thuhet aty. FATF tregon një rast kur janë kapur mbi 1 milion stërlina, disa prej të cilave të destinuara për në Shqipëri. “Agjencia NRA llogarit se mes prillit 2012 dhe marsit 2014, më shumë se 6 milionë paund janë sekuestruar në kufirin britanik. Nga 1 Janari 2017 deri në 28 shkurt 2017, forcat kufitare kanë sekuestruar më shumë 11.5 milionë paund të dyshimta që po transportohej përmes kufirit britanik. Një operacion i shumëfishtë për monitorimin tre-javor të aktiviteti në porte, sekuestroi rreth 1 milion paund me destinacion Shqipërinë, Belgjikën, Brazilin, Holandën e Turqinë”, thuhet në raport. Por me reformën në drejtësi, të gjitha këto para pritet që të sekuestrohen./SOT
Diskutime rreth kësaj post