“Nisma”, do të jetë partia e re me të cilën Rudina Hajdari do të garojë në zgjedhjet parlamentare të 25 prillit. Në një interviste për ‘Ilva Now’, deputetja tha se, megjithëse ligji i jep të drejtën për të regjistruar një forcë politike, do të ndiqet procedura e mbledhjes së firmave.
“Jemi në proces, jemi duke mbledhur firmat. Kemi qenë gati në të gjitha zonat e Tiranës, Gramsh, këtë javë do të shkojmë në Bajram Curr. Nuk do të shkojmë me 3 mijë firma, por me 10 mijë firma”, tha ajo.
Znj. Hajdari tha se, partisë do t’i bashkohen njerëz të papërlyer ndërsa kryetari do të “zgjidhet” nga votuesit, pasi do të jetë emri që do të marrë më shumë vota në zgjedhjet e ardhshme.
“E kemi quajtur ‘Nisma’ pasi është një iniciativë për të ndryshuar gjërat. ‘Nisma’ do të ketë njerëz të papërlyer, parimi që kemi vendosur është që nesër kur të shkojnë në zgjedhje, ai që do të votohet më shumë do të jetë kryetari i kësaj partie”, deklaroi znj. Hajdari.
Ligjvënësja e Parlamentit nuk preferoi të fliste për pritshmërinë, duke thënë se nuk dëshirojnë të jenë si mazhoranca dhe opozita.
“Nuk di të flas për mandate në mënyrë konkrete sepse i shikoj të gjithë që bëjnë këto parashikimet që janë komplet jashtë çdo logjike. Mazhoranca duket e dorëzuar në çdo aspekt dhe është në fundin e saj thotë do marrim 74 mandate kurse opozita jashtë Parlamentit ka pritshmëri shumë të larta në një kohë kur ka bërë gabime fatale, pasi flet për 85 mandate”, tha znj. Hajdari.
Diskutime rreth kësaj post