Ambasadori i Italisë në Shqipëri, Fabrizio Bucci ditën e djeshme deklaroi se Italia është e zhgënjyer që negociatat me Shqipërinë nuk u hapën as këtë herë. Bucci u shpreh se Italia ka qenë një nga mbështetëset më të mëdha që nga fillimi. Ai theksoi se puna do të vazhdojë pasi negociatat duhet të hapen sa më parë. Sipas tij, ka ardhur koha që Bashkimi Europian të japë sinjal të fortë sidomos për Shqipërinë.
“Për ne si Itali ishte një zhgënjim fakti që nuk mundëm edhe njëherë tjetër të hapim negociatat. Italia ka qenë përherë pranë Shqipërisë, që nga fillimi. Kemi mbështetur hyrjen e vendit tuaj në unionin europian. Ne do të vazhdojmë të punojmë, sepse besimi ynë është që brenda këtij viti do të çelen negociatat. Shqipëria i ka bërë detyrat që i kemi lënë vitet e kaluara. Është një problem dhe detyrë e unionit europian, jo më e Shqipërisë. Është koha që BE të japë një sinjal të fortë për këto vende, e në mënyrë të veçantë për Shqipërinë”, tha ai.
Po ashtu ambasadori u ndal edhe tek reforma në drejtësi. Ai u shpreh se qeveria italiane është duke kontribuuar financiarisht e duke dhënë mbështetje në bashkëpunime. Bucci tha se reforma në drejtësi është një hap shumë i rëndësishëm i Shqipërisë, megjithatë sipas tij duhet punë dhe bashkëpunim ende në mënyrë që reformat të përparojnë akoma dhe më shpejt.
“Ne si Itali jemi pranë Shqipërisë në këtë sfidë të reformës në drejtësi. Mbështesim qeverinë me ekspertët, kontribuojmë financiarisht dhe bashkëpunojmë me BE dhe SHBA. Është një reformë thelbësore, që funksionon për të luftuar krimin e organizuar e korrupsionin. Prandaj ne mbështesim përpjekjet e qeverisë sepse janë bërë hapa të rëndësishëm, por nuk mjaftojnë, duhet bërë më shumë përpara. Apeli im është që të punojmë të gjithë bashkë që reformat të mund të avancojnë shumë më shpejt”, tha Bucci.
Diskutime rreth kësaj post