Presidenti Ilir Meta ka nisur një vizitë në Hungari, ndërkohë që në Shqipëri kanë plasur arrestimet në radhët e zyrtarëve. SPAK po godet prokurorë, policë dhe krerë bashkish, ndërsa sinjalet janë se do të shkohet në nivele akoma dhe më të larta.
Por teksa reforma po jep frytet e saj, kreu i shtetit është takuar dje me kryeministrin hungarez Viktor Orban, politikanin që shpëtoi ish-kryeministrin maqedonas Nikolla Gruevski nga burgu. Ndaj Gruevskit u ngritën disa akuza penale dhe pak para se të kërkohej arrestimi i tij, ai u arratis nga Shkupi dhe mori azil politik në Hungari. Ishte Viktor Orban ai që e strehoi pavarësisht presioneve nga SHBA dhe nga BE. Por si për koincidencë, në një kohë kur gurët e luftës antikorrupsion kanë nisur të lëvizin edhe në Shqipëri, presidenti duket se ka vendosur të gjejë qetësi te Orban.
Nuk dihet nëse Meta po tenton të përgatisë terrenin njësoj si Gruevski, por dyshimet janë të shumta. Mediat ruse në shumë raste kanë marrë në mbrojtje Metën, ndërkohë pak ditë më parë të njëjtën gjë bënin dhe mediat hungareze. Pyetja që shtrohet është: A po tenton Meta të shkojë te miku i tij Gruevski dhe t’u shpëtojë telasheve që mund të vijnë nga SPAK? Ajo që shton dyshimet është se Meta ka udhëtuar në Hungari bashkë me bashkëshorten, Monika Kryemadhi. Ata morën pjesë në ceremoninë e vendosjes së bustit të Skënderbeut, por si duket vizita ka zgjatur.
Qëndrimet
Ajo që vihej re ishte një entuziazëm tepër i lartë i Metës gjatë takimeve me Orban. Meta ka reaguar 3 herë në rrjetet sociale, duke mos e fshehur gëzimin dhe elozhet për Orban.
“Një takim i frytshëm me një mik të veçantë, Kryeministrin e Hungarisë, Viktor Orban. E falënderova me mirënjohje për mbështetjen domethënëse dhe pa rezerva, që i ka dhënë Shqipërisë, për çeljen e negociatave të anëtarësimit me Bashkimin Europian. Vlerësova angazhimin e Qeverisë së Tij për të nxitur dhe thelluar më tej marrëdhëniet ekonomike dhe tregtare midis dy vendeve tona, si dhe theksova vullnetin e Shqipërisë për t’i shndërruar në të njëjtin nivel të shkëlqyer, siç janë ato politike. I lumtur, që vitin e ardhshëm do të festojmë 100-vjetorin e vendosjes së marrëdhënieve diplomatike me rezultate edhe më domethënëse dhe të prekshme për qytetarët tanë”, – tha Meta.
Në një tjetër status Meta është ndalur te raportet mes Hungarisë dhe Shqipërisë. “E ardhmja e marrëdhënieve të shkëlqyera miqësore, historike dhe tradicionale mes Shqipërisë dhe Hungarisë është jashtëzakonisht premtuese. Mirënjohje Presidentit Ader për rikonfirmimin e vullnetit të përbashkët dhe faleminderit për pritjen e ngrohtë”, – tha ai. Pra sinjalet janë se takimi i Metës me Orban ka qenë i suksesshëm.
Diskutime rreth kësaj post