Presidenti Ilir Meta ka nisur të përgatisë militantët e LSI për dhunë para e pas zgjedhjeve të 25 prillit. Dje ai u ka dërguar një letër institucioneve vendase dhe të huaja ku ngre shqetësimin se PS po minon demokracinë para zgjedhjeve, por kjo nuk është lëvizja e vetme, pasi Meta po përgatitet për tensione.
Një gazetë pranë tij ka bërë dje një kryeartikull ku shprehej se opozita duhet të përgatitet jo vetëm për të fituar me votë, por edhe me dhunë. Sipas kësaj të përditshme, Rama do i vjedhë zgjedhjet dhe prandaj opozita duhet të jetë e përgatitur për përplasje force. Sipas saj kjo qeveri nuk rrëzohet dot me zgjedhje.
“Opozita duhet të përgatitet për çdo skenar përballje pasi flitet për jetë a vdekje mes dy botëve: botës së krimit të rilindjes dhe botës së qytetarëve që duan një ndryshim dhe jetën më të mirë”, – thuhet në artikull.
Pra duket qartë se kreu i shtetit po mobilizon votuesit e tij në dy aspekte. Së pari po u jepet mesazh që të mbrojnë me forcë votën duke i përgatitur për dhunë dhe përplasje fizike. Por elementi tjetër është se nëse PS i fiton zgjedhjet atëherë do të ketë luftë. Po ashtu kreu i shteti duket se e bën fakt të kryer humbjen e zgjedhjeve dhe po bën gati çetën për të luftuar me PS.
Meta në një linjë me Berishën
Ish-kryeministri Sali Berisha ka qenë ai i cili vazhdimisht ka dhënë sinjale se mund të kemi kaos dhe dhunë pas zgjedhjeve. Javët e fundit në disa dalje publike ai është shprehur hapur se opozita duhet të përgatitet për një 20 shkurt të dytë nëse Rama prek zgjedhjet. Më 20 shkurt ra busti i diktatorit Hoxha dhe Berisha ka kërkuar që të ndodhë e njëjta gjë me Ramën, pra të rrëzohet me forcë.
“Nëse më pyesni personalisht jam kundër e kam thënë dhe publikisht, gjykimi në retrospektivë është i thjeshtë. Me rëndësi që largimi nga Parlamenti nuk soli efektet për të cilat u projektua dhe nuk duhet të ndodhë më në të ardhmen. Beteja parlamentare është parlamentare, pavarësisht nga bullizmi dhe keqtrajtimi i opozitës, çdo shkelje ligjore, duhet qëndruar aty. Ky është mësimi që marrim”, – tha Berisha pak kohë më parë.
Meta flet për sherrin te FRD
Dje presidenti dha një prononcim për mediat, ku sërish sulmoi qeverinë dhe dha sinjale përplasje. Ai u ndal mbi sherrin te FRD, ku tha se dhuna e ushtruar nga ana e policisë bashkiake në praninë e presidentit, tregon se kemi të bëjmë me një bandë që kërkon të kapë institucionet.
Por këtu shtoi se Presidenca është një kala e papushtueshme.
“Sot duhet të ishin marrë në ndjekje penale të paktën për shpërdorim detyre përveç zgjidhjes me vetëgjyqësi. Këto gjëra zgjidhen me marrëveshje mes dy palëve ose në gjykatë. Të ushtrosh dhunë me persona civilë dhe në prezencë të presidentit tregon se kemi të bëjmë me një bandë që kërkon të nënshtrojë çdo institucion. Presidenca është një kala e papushtueshme në një shtet ku të gjitha institucionet janë të kapura nga ana e partisë shtet. Falë qëndresës së presidentit dhe popullit heroik të marsit do të rivendoset demokracia në të gjitha institucionet”, – tha ai.
Presidenti iu përgjigj edhe deklaratave të kryeministrit Edi Rama, i cili ka thënë se Meta kërkon të pengojë reformën në drejtësi. Përgjigjja e Metës lidhur me këtë deklaratë të kryeministrit është se sipas tij reforma s’mund të jetë më e kapur se ç’është tani.
Diskutime rreth kësaj post