Ish-kryeministri i Kosovës dhe kreu i AAK-së, Ramush Haradinaj, ka njoftuar se po qëndron për një vizitë në Tiranë ku edhe është takuar me kryeministrin e Shqipërisë, Edi Rama.
Në këtë takim, që vjen në një moment kur raportet në mes të dy Qeverive janë në një nivel tejet të ulët, Haradinaj ka thënë se kanë diskutuar pikërisht për sfidat që e presin Kosovën në aspektin e dialogut dhe integrimeve.
Kreu i AAK-së i cili po ashtu në të kaluarën ka pasur përplasje me Edi Ramën, ka thënë se i ka kërkuar kryeministrit të Shqipërisë që në të gjitha nivelet të ndihmojë Kosovën në tejkalimin e sfidave dhe të përshpejtojë integrimin e vendit.
Njoftimi i plotë i Haradinajt:
“Sot në Tiranë një takim vëllazëror me Kryeministrin e Shqipërisë, Edi Rama.
Diskutuam për zhvillimet që po kalon Kosova, Shqipëria dhe rajoni dhe për proceset që na presin, veçanërisht për sfidat e Kosovës në çështjet që kanë të bëjnë me dialogun, sigurinë dhe perspektivën e integrimeve euro-atlantike.
I kërkova kryeministrit shqiptar që në të gjitha nivelet e bisedave me faktorin ndërkombëtar e kombëtar të ndihmojë në tejkalimin e sfidave që i ka Kosova dhe të përshpejtojë integrimin e saj. E falënderova përzemërsisht për kujdesin e tij dhe të Shqipërisë në këtë periudhë jo të lehtë që po kalon Kosova.“- shkruan ai.
Diskutime rreth kësaj post