Genc Pollo: Pamundësia e PD për të votuar kundër rritjes së borxhit nga qeveria Rama, është alarmuese

Ish-deputeti dhe anëtari i Këshillit Kombëtar të Partisë Demokratike Genc Pollo, ka folur për rritjen e borxhit në nivele alarmante nga ana e qeverisë.

Pollo thekson se edhe PD-ja e ka të pamundur që të frenojë rritjen e borxhit publik nga qeveria Rama.

Ai shton se kjo pamundësi e PD-së për të frenuar borxhin e qeverisë është alarmuese.

Postimi i Genc Pollos:

“Pamundësia e PD zyrtare për të votuar kundra rritjes së borxhit publik nga qeveria Rama është alarmuese.
PD në tetë vite opozitë ka kritikuar me të drejtë borxhin publik përtej nivelit 63% të v. 2013. PD në tetë vite opozitë me shumë të drejtë ka denoncuar se paratë e huave shtetërore janë derdhur kryesisht në PPP abuzive e korruptive.

Fondi Monetar Ndërkombëtar e Komisioni Europian vazhdimisht kanë shprehur shqetësim për rritjen e borxhit publik e për mos-transparencën e PPP-ve.

Prandaj shpjegimi i votës nga një deputet i PD se “votuam në linjë me partnerët ndërkombëtarë” është i gënjeshtërt e i padenjë. I gënjeshtërt siç shpjeguam më lart. I padenjë pasi deputetët duhet të venë të parin interesin publik të shqiptarëve përkundrejt kujtdo mbi tokë që u këshillon të kundërtën”.