Gazetari Frrok Çupi e konsideron të duhur shkarkimin e Presidentit Ilir Meta nga Kuvendi. Sipas Çupit, nuk mund të paralizohej me një presidenti të tillë, por shtoi se kjo është një ngjarje që askush se dëshironte, pasi precedentë të tilla janë shumë të rrallë dhe asnjëherë të mira për vendin.
Në një intervistë për Report Tv, Çupi tha se Meta shkeli shpirtin e kombit dhe deformoi orientimin kombëtar nga perëndimi drejt një bote të panjohur duke e kthyer atë në një “sfungjer që të mund të shtrembëronte si të donte”. Çupi thotë se Meta shkeli ligjet dhe tentoi ta fusë vendin në luftë, me qëllimin e vetëm për të qëndruar në qetësinë e tij.
“Është një ngjarje që në thellësi askush nuk do ta dëshironte pasi është hera e parë që parlamenti është detyruar të shkarkojë presidentin. Meta me veprimet e tij, ai ka shkelur shpirtin e kombit, jo Kushtetutën si libër. Meta deformoi orientimin kombëtar tonin nga perëndimi tentoi ta drejtonte drejt një bote të panjohur. Tentoi të sfumojë shtetin dhe ta bëjë një sfungjer që mund ta shtrembëronte kushdo. Degjeneroi konceptin e zgjedhjes duke ndaluar qytetarin të zgjedh lirisht. Nxiti konflikte. Bëri përpjekje për të pasur ndasi mes njerëzish dhe krahinash. U ngarkua aq shumë me mëkate politike dhe kriminale duke qenë i vetmi më i famshmi në kontinent si më i korruptuar. Korrupsioni i Metës është epik. Në të gjithë Europën njihet si njeriu i kapur në vjedhje, në pasurim të pabazë”, tha Çupi.
Çupi tha se shkarkimi i Metës është vetëm fillimi, pasi atë e presin organet e drejtësisë.
“Pas shkarkimit Metën e presin organet e drejtësisë, dhe jo vetëm atë por edhe Berishën. Ai do të bëhet pjesë e hetimit. Rruga e tij është një rrugë plot vështirësi një rrugë nëpër gjyqe, nëpër dënime, nëpër prokurore e investigime dhe besoj se këto që u thanë sot në parlament janë vetë një pjesë e saj që manifestohen në rrugën gjykuese”, tha Çupi.
Diskutime rreth kësaj post