Frrok Çupi: Hapja e dosjeve të Gërdecit dhe “21 Janarit”, sinjale se procesi hetimor për Berishën ka nisur

Analisti Frrok Çupi ka komentuar ditën e djeshme sërish shpalljen “non grata” të ish-kryeministrit Sali Berisha nga DASH.

Çupi u shpreh se shpjegimi i bërë për Berishën pas shpalljes “non grata” bën shumë përjashtim nga të tjerët. Ai tha se Berisha e kishte minuar drejtësinë dhe ajo nuk mund të reagonte para Amerikës. Sipas Çupit nga viti 1997 nuk kishte më drejtësi në vend, por vetëm kontroll të saj.

“Fakti se për Berishën u bë një shpjegim, do të thotë se bën përjashtim nga shumë të tjerë. Në fillim kishte fituar një lloj besimi nga Amerika për të qeverisur në një vend ish-komunist. A duhej të fliste drejtësia përpara? Sigurisht, por në rastin e Berishës që e kishte minuar drejtësinë dhe ishte nën një korrupsion jashtëzakonisht të madh, cila drejtësi do të fliste para SHBA? SHBA dhe BE janë promotorët për reformimin e reformës në drejtësi. Prej ‘92 nuk kishim drejtësi, ishte e formuar me militantë politikë, të kthyer në shërbëtorë të disa personave”, – tha Çupi.

Ai e quajti Berishën autorin kryesor të masakrës së vitit 1996 teksa u shpreh se nuk u paraqit asnjëherë në burg. Çupi tha se po ashtu për shumë akte mizore si vrasja e Remzi Hoxhës, 3 mijë vetët e vrarë në 1997 apo grushtin e shtetit në 1998, sipas tij askush nuk u paraqit para gjykatës pasi drejtësia nuk ekzistonte.

“Kemi masakrën e ‘96, ku Berisha ishte autori kryesor dhe nuk u paraqit asnjëherë në gjykatë. Kemi vitin ‘97 ku u vranë 3 mijë njerëz dhe askush nuk shkoi para gjykatës. Kemi vitin ‘98 ku u bë grusht shteti, kemi vrasjen e Remzi Hoxhës. Aktet mizore që kanë ndodhur në këto 30 vite e kanë kaluar diktaturën”, – tha ai.

Lidhur me padinë e Berishës ndaj Blinken në Francë, Çupi deklaroi se Berisha po e bën për të fituar kohë pasi nuk mund të fitojë dot me politikën amerikane. Ai tha se politika amerikane di të veprojë politikisht pa dhënë asnjë masë ashtu siç ka izoluar presidentin Ilir Meta. Sipas tij puna e drejtësisë së vërtetë fillon tani pas hapjes së dosjeve të Gërdecit dhe “21 Janarit” që çojnë te krimet e Berishës.

“Besoj se Berisha do të fitojë kohë në Francë. Nuk mund të fitohet me politikën. Amerika ka vepruar politikisht, e ka izoluar presidentin e Shqipërisë për tentativat e tij për të prishur Shqipërinë pa dhënë asnjë masë. Tani fillon puna e drejtësisë. Procesi gjyqësor dhe hetimor për Berishën ka nisur. Për aq kohë sa u hap dosja e Gërdecit, “21 Janarit”. Kam përshtypjen se këto shkojnë te krimet e Berishës”, – tha ai.