Kreu i republikanëve Fatmir Mediu është shprehur se politikanët amerikanë dallojnë shumë me ata europianë, ku ka sjellë dy shembuj gjatë vizitës së ish-Presidentit Bush në Shqipëri në vitin 2007.
Ai thotë se gjatë një dreke, një prej kamarierëve kërkoi që të puthë në faqe ish-Presidentin Bush, ndërkohë që ky i fundit pranoi pa asnjë problem. Mediu vijoi më tej duke thënë se të gjithë kamarierët më pas erdhën për ta puthur e për ta takuar.
“Madhështia e politikanëve amerikanë është raporti njerëzor që ata krijojnë me njerëzit. Ka një diferencë të madhe mes politikanëve europianë dhe ata amerikanë. Raportin njerëzor e kanë shumë të rëndësishëm, të japë dy shembuj. Një moment kur ishin në takim me Presidentin Bush dhe ishte zoti Berisha, ishim për drekë. Ndër të tjera, një nga kamarierët i thotë zotit Berisha, a mund ta puth në faqe Presidentin amerikan. Berisha ngeli i shtrënguar në atë moment. Presidenti Bush tha çfarë kërkon ai, do që të të puthë në faqe. Po mirë tha le të vijë. Më pas të gjithë kamarierët burra dhe gra erdhën për ta puthur. Tha të lutem hiqe pak kamerën se po doli kjo foto në SHBA nuk e di se çfarë do bëhet”, u shpreh Mediu në emisionin Repolitix.
Gjithashtu Mediu thotë se i ka kërkuar dhe një autograf ish-Presidentit për djalin e tij të cilin ja ka dhënë pa asnjë problem.
“Edhe një moment personal. Djali im ishte i vogël në atë kohë dhe ishte mësuar se unë do t’i çoja ndonjë autograf. Më tha a mund t’i marrësh një autograf Bushit. Kur ishim të ulur, e pyeta a është e mundur të ma japësh. Ai me mirësinë e vetë më thotë, se si e quajnë djalin. Ma nënshkroi dhe ma dha. Kur u larguam më tha bëji të fala djalit. Unë i thashë djalit ke të fala nga Presidenti, ai mu përgjigj ku më njeh mua ai. Raporti njerëzor i tyre dhe sidomos vlerësimi që kanë pasur me shqiptarët është jashtëzakonisht e vlefshme. Ruajtja e këtyre raporteve krahas atyre politike është e vlefshme”, tha Mediu.
Diskutime rreth kësaj post