Eksperti i ISHP: Janë me dhjetëra mjekë e infermierë të infektuar në QSUT, ja problemi kryesor në spitale

Eksperti i Shëndetit Publik, Erion Dasho ka bërë dje kritika të forta mbi mënyrën se si është menaxhuar situata e koronavirusit në QSUT. Përmes një postimi në Facebook, eksperti Dasho ka deklaruar se QSUT u kthye në vatrën më të madhe të transmetimit të koronavirusit në vend.

Sakaq ai ka ngritur alarmin se janë me dhjetëra mjekët dhe infermierët e infektuar dhe ka përmendur faktin se mjeku i parë që humbi jetën nga COVID ishte një profesor i njohur i QSUT.

“Prej kohësh ka nisur debati nëse shëndetësinë duhet ta menaxhojnë mjekët apo menaxherët. Argumenti kryesor pro mjekëve është njohja pothuajse ekskluzive e proceseve komplekse të “prodhimit” të kujdesit shëndetësor. Argumenti kryesor pro menaxherëve është, çuditërisht, shumë i ngjashëm.

Kompleksiteti i të njëjtave procese jepet si argument që mjekët duhen lënë të lirë të merren me pjesën mjekësore, duke përfshirë ekonomistë, juristë, etj. në menaxhimin e pjesës jo-mjekësore.

Debati vazhdon. Shqipëria e kohës së COVID po jep një argument të fortë në favor të menaxherit mjek ose, të paktën, menaxherit jo-mjek, por me njohuri të thella dhe solide mjekësore”, – është shprehur eksperti i ISHP.

Më tej ai ka vijuar duke thënë se QSUT është institucioni kryesor, ose flamurmbajtësi i sistemit tonë shëndetësor. Për këtë arsye, sipas Dashos QSUT pritej të ishte vendi më i sigurt lidhur me COVID sepse shërben si pika e referimit për gjithë sistemin tonë shëndetësor.

“QSUT pritej të ishte: Burimi i protokolleve dhe trajnimeve për gjithë pjesën tjetër të sistemit. Modeli për riorientimin e spitaleve dhe gjithë institucioneve të tjera shëndetësore në epokën COVID. Jo vetëm që këto nuk ndodhën, por QSUT u kthye në vatrën më të madhe të transmetimit të COVID në vend. Ndonëse nuk janë bërë publike të dhëna të detajuara, media ka raportuar se shumë nga vatrat e COVID gjatë fundit të muajit maj dhe në vazhdim u ndezën pikërisht nga pacientë apo pjesëtarë të personelit të QSUT-së. Janë me dhjetëra mjekët dhe infermierët e infektuar dhe mjeku i parë që humbi jetën nga COVID ishte një profesor i njohur i QSUT”, – ka shkruar më tej mjeku Erion Dasho.