‘Duhet të bllokohet menjëherë ky grusht shteti’, ish-deputeti del me deklaratën e fortë

Ish-deputeti i Partisë Demokratike, Tritan Shehu, thotë se ndryshimet kushtetuese në këtë moment synojnë ta çojnë vendin në një autokraci të fortë.

“Unë mendoj se problemi nuk shtrohet duhen hapur apo jo listat. Problemi është se e gjithë kjo lojë që po bëhet nga PS është jo korrekte, e rrezikshme. Të kërkosh në këto momente të ndërrosh kushtetutën kur nuk ke gjykatë kushtetuese është një vepër që bie ndesh me demokracinë. Të kërkosh të shkelësh marrëveshjen që sapo e ke firmosur.

Zëri i shqiptarëve që manifestohet nga forcat politike nuk respektohet dhe kërkohet të ngushtohet nga disa zëra të vetëm. Ajo që kërkon Rama lidhet me mosdëgjimin e zërit të shqiptarëve. Rama ka frikë nga dëgjimi masiv i zërit të shqiptarëve.Çdo prekje e kushtetues është një akt madhor dhe nuk preket sa herë duam ne. Nuk është vetëm koha e shkurtër, por edhe mungesa e instrumenteve më të rëndësishëm, gjykata kushtetuese dhe parlamenti i cunguar që nuk ka të drejtë të prekë kushtetutën. Kjo është gjëja më antidemokratike që mund të ekzistojë. Kjo synon ta çojë Shqipërinë nesër në një autokraci të fortë, që na largon nga rruga jonë drejt BE-së” – tha ai.

Për Shehin, këto ndryshime kushtetuese janë një grusht shteti dhe duhet të ndalohen menjëherë.

“Unë e shikoj me shumë shqetësim këtë situatë, pasi po shkon në drejtim të antidemokracisë dhe nuk dihet se ku do të shkojmë. E ardhmja nuk është shumë optimiste, duhet të bllokohet menjëherë ky grusht shteti, i cili ka ndodhur edhe në vende të tjera lindore. Duhet të jemi shumë të qartë për këtë, janë në lojë fatet e demokracisë shqiptare”, – u shpreh Shehi.